МЗС Расіі: пераход на адзіную валюту непазбежны

Статс-сакратар - намеснік міністра замежных спраў РФ Рыгор Карасін лічыць непазбежным рух да валютнага саюзу Расіі і Беларусі. Пры гэтым у ходзе сустрэчы з кіраўніцтвам МЗС Беларусі 30 студзеня Рыгор Карасін падкрэсліў, што ўвядзенне валюты патрабуе дбайнай прапрацоўкі і з'яўляецца няпростым пытаннем.

Статс-сакратар расійскага МЗС заўважыў, што агульная валюта можа стаць рэальнасцю ў Еўразійскім саюзе, які павінен прыйсці на змену АЭП. Паводле яго слоў, адзіная валюта з'яўляецца формай далейшай інтэграцыі дзвюх краін, перадае БелТА.

Расія супраць прымянення санкцый да Беларусі

Таксама Рыгор Карасін заявіў, што Расія выступае супраць санкцый з боку Еўрапейскага саюза і ЗША ў дачыненні да Беларусі. Дыпламат адзначыў, што "палітыка санкцый заводзіць сітуацыю ў тупік" і падкрэсліў неабходнасць удзелу Беларусі на ўсіх форумах.

"Мы прыхільнікі таго, каб кантакты працягваліся, каб усе праблемы вырашаліся ў духу адкрытасці і транспарэнтнасці. Такой пазіцыі мы будзем прытрымлівацца і далей", - запэўніў Рыгор Карасін.

"Праблема ў тым, што нам Еўропа спрабуе навязаць сваю пазіцыю. Але ў любой краіне можна знайсці незадаволеных уладай. Праблемы ёсць у любой краіны, а выпінаць іх, здзекавацца, спрабаваць задушыць - гэта контрпрадуктыўна", - дадаў дыпламат.

Як паведамляў Тэлеграф, 3 студзеня прэзідэнт ЗША Барак Абама пашырыў санкцыі супраць Беларусі, а Рада міністраў замежных спраў заявіла, што ўзмоцніць ціск на беларускія ўлады.