Амбасада Беларусі ў сталіцы Лівіі Трыпалі працягвае прадпрымаць намаганні па эвакуацыі беларускіх грамадзян. Пра гэта 28 лютага заявіла намесніца начальніка ўпраўлення інфармацыі — начальніка аддзела прэс-службы МЗС Марыя Ваньшына. Па яе словах, за мінулыя выходныя ўдалося вывезці з краіны яшчэ дзесяць грамадзян Беларусі.
У прыватнасці, пры садзейнічанні ўкраінскага боку ў Кіеў даставілі сем беларускіх грамадзян. «Пасольствам Беларусі ва Украіне нашым грамадзянам аказана ўсё неабходнае садзейнічанне. У цяперашні час яны ўжо знаходзяцца ў Беларусі», — адзначыла Марыя Ваньшына.
Таксама з дапамогай супрацоўнікаў прадстаўніцтва адной з нямецкіх кампаній у Лівіі трое беларускіх грамадзян прыбылі ў Бон (Германія). «Супрацоўнікі беларускага дыпламатычнага прадстаўніцтва ў Лівіі знаходзяцца ў пастаянным кантакце з тым, хто стаіць на консульскім уліку, а таксама грамадзянамі Беларусі, што звярталіся ў амбасаду», — паведамілі ў прэс-службе МЗС Беларусі.
Як перадаваў Тэлеграф, днём раней Марыя Ваньшына назвала не адпаведнай рэчаіснасці інфармацыю аб тым, што ў Лівіі ваююць беларускія найміты. «Распаўсюджаныя шэрагам СМІ чуткі аб удзеле грамадзян Беларусі ў якіх-небудзь ваенных фармаваннях на тэрыторыі Лівіі не адпавядаюць рэчаіснасці», — заявіла яна.
