Генпракуратура 23 лістапада накіравала ў Вярхоўны суд крымінальную справу па абвінавачанні ў службовых злачынствах старэйшай следчай па асабліва важных справах Святланы Байковай. Суд будзе разглядаць 15 эпізодаў, звязаных з дзейнасцю падсуднай ў 2006-2007 гадах, калі яна ўзначальвала групу па расследаванні гучных карупцыйных злачынстваў на беларускай мытні.
У канчатковай пастанове аб прыцягненні Святланы Байковай ў якасці абвінавачанай ёй інкрымінуюцца наступныя артыкулы Крымінальнага кодэксу: артыкул 393 (Прыцягненне ў якасці абвінавачанага заведама невінаватага); артыкул 394 (Прымус да дачы паказанняў); артыкул 397 (Заведама незаконнае затрыманне або заключэнне пад варту); артыкул 424 (Злоўжыванне ўладай або службовымі паўнамоцтвамі); артыкул 426 (Перавышэнне ўлады або службовых паўнамоцтваў), перадае АФН.
Як раней паведамляў Тэлеграф, следчая Генпракуратуры была арыштаваная ў лютым 2010 года на працоўным месцы. Святлане Байковай інкрымінавана некалькі складаў злачынстваў, у тым ліку перавышэнне ўлады.
