Асноўная мэта рэгулявання беларускага сегменту сеткі інтэрнэт — "не проста развіццё інтэрнэту, а стварэнне ўмоў для яго паскоранага развіцця". Такое меркаванне выказаў 25 кастрычніка намеснік начальніка Аператыўна-аналітычнага цэнтру (ААЦ) пры прэзідэнце Беларусі Уладзімір Рабаволаў на пасяджэнні круглага стала "Беларускі сегмент ў сетцы інтэрнэт: праблемы і перспектывы развіцця".
Паводле слоў спецыяліста, роля Міжведамаснага кансультатыўнага савета пры ААЦ, у які ўваходзяць прадстаўнікі дзяржорганаў і прыватных аператараў сувязі, будзе ўзрастаць, перадае БелТА.
Уладзімір Рабаволаў адзначыў, што пакуль Беларусь у развіцці інтэрнэту адстае ад іншых развітых краін. «Аднак у Беларусі створаны арганізацыйныя, прававыя і тэхнічныя ўмовы для развіцця сферы інфармацыйна-камунікацыйных тэхналогій, што ў выніку дазволіць даць грамадзянам магчымасць доступу да амаль ўсёй інфармацыі, што іх цікавіць», — падкрэсліў намначальнік ААЦ.
Паводле слоў Уладзіміра Рабаволава, роля ААЦ як незалежнай рэгулятара звязана са стварэннем спрыяльнага канкурэнтнага асяроддзя для развіцця і беларускага сегменту сеткі інтэрнэт, і ІКТ ў цэлым. Адным з дакументаў, накіраваных на гэта, стаў указ № 515, адзначыў спецыяліст.
Згодна з дакументам, у Беларусі будзе створана адзіная рэспубліканская сетка перадачы дадзеных (АРСПД). Да 1 студзеня 2012 года ў яе склад павінны ўключыць існыя сеткі перадачы дадзеных дзяржорганаў. Прыватныя кампаніі змогуць далучыць свае сеткі да АРСПД у добраахвотным парадку. Пры гэтым у склад АРСПД не будуць уключацца сеткі перадачы дадзеных, прызначаныя для забеспячэння нацыянальнай бяспекі, абароны і аховы правапарадку.
Дакумент таксама надзяліў ААЦ статусам незалежнага рэгулятара ў сферы інфармацыйна-камунікацыйных тэхналогій, які вызначае стратэгію развіцця ІКТ, узгадняе інвестыцыйныя праекты і праекты заканадаўчых актаў, пастановы Саўміна ў сферы ІКТ, рэгулюе тарыфы на паслугі электрасувязі.
Аператыўна-аналітычны цэнтр да 1 снежня 2010 года павінен стварыць рэспубліканскае ўнітарнае прадпрыемства «Нацыянальны цэнтр абмену трафікам», а да 1 студзеня 2011 года — вызначыць сумесна з мінсувязі парадак далучэння сетак перадачы дадзеных да АРСПД і пропуску трафіку.
«Нацыянальны цэнтр абмену трафікам» будзе мець права на пропуск міжнароднага трафіку і далучэнне да сетак электрасувязі замежных дзяржаў. Цэнтр таксама будзе забяспечваць абарону ад несанкцыянаванага доступу да АРСПД, узаемадзеянне сетак перадачы дадзеных, арганізацыю разлікаў за далучэнне сетак да АРСПД.
