Па выніках 2010 года зварот знешняга гандлю таварамі Беларусі склаў 60,1 млрд. даляраў, павялічыўшыся ў параўнанні з 2009 годам на 20,5%. Пры гэтым аб'ём экспарту вырас да 25,2 млрд. даляраў (на 18,4%), імпарту — да 34,9 млрд. даляраў (на 22,9%). Такім чынам, адмоўнае знешнегандлёвае сальда краіны склала 9,6 млрд. даляраў, павялічыўшыся за год на 32,7%.
Як сведчаць дадзеныя Нацыянальнага статыстычнага камітэту Беларусі, найбольш паспяхова развіваліся гандлёвыя адносіны краіны з дзяржавамі-членамі СНД (рост на 23,5%). Аб’ём экспарту ў гэтыя краіны павялічыўся на 44,9% да 13,5 млрд. даляраў, імпарту — на 12,5% да 20,5 млрд. даляраў. У выніку адмоўнае сальда гандлю з дзяржавамі СНД склала толькі 78,7% ад узроўню папярэдняга года, або 7 млрд. даляраў супраць 8,9 млрд. даляраў у 2009 годзе.
Разам з тым асноўным знешнегандлёвым партнёрам Беларусі ў 2010 годзе стала Расія, на долю якой прыпадала 47,7% знешнегандлёвага звароту краіны (27,8 млрд. даляраў, рост на 18,9%), 38,9% экспарту (9,8 млрд. даляраў, рост на 46,1%), 51,8% імпарту (18,1 млрд. даляраў, рост на 8%). Адмоўнае беларуска-расійскае гандлёвае сальда паменшылася на 18% з 10 млрд. даляраў да 8,2 млрд. даляраў.
Доля краін па-за СНД у знешнегандлёвым звароце Беларусі склала 43,4%, павялічыўшыся ў грашовым аб’ёме да 26,1 млрд. даляраў (на 16,8%). Пры гэтым экспарт у гэтыя краіны, які складае 46,4% ад агульнага экспарту Беларусі, паменшыўся на 2,2% да 11,7 млрд. даляраў, імпарт з гэтых краін (доля — 41,2%) — павялічыўся на 38,8% да 14,4 млрд. даляраў. Разам з тым сальда гандлю з гэтымі краінамі склалася адмоўным, склаўшы 2,6 млрд. даляраў у параўнанні з дадатным сальда ў 2099 годзе, роўным 1,6 млрд. даляраў.
Як раней паведамляў Тэлеграф, старшыня праўлення Нацыянальнага банка Беларусі Пётр Пракаповіч заявіў, што ў 2015 годзе неабходна прыйсці да дадатнага сальда знешняга гандлю, паколькі без гэтага пад пагрозай могуць апынуцца ўсе планы развіцця эканомікі краіны.
