Прэзідыум палітрады Аб'яднаных дэмакратычных сіл Беларусі падтрымаў ініцыятыву сустаршыні АДС Анатоля Лябедзькі пра скліканне тэрміновых палітычных кансультацый. Іх прадметам павінна стаць абмеркаванне магчымай адмовы апазіцыйных партый ад далейшага ўдзелу ў мясцовых выбарах у сувязі з малым прадстаўніцтвам АДС у выбаркамах.
«Пасля таго як прадстаўнікі дэмакратычных сіл фактычна не былі ўключаны ні ў акруговыя камісіі, ні ва ўчастковыя, мэтазгоднасць далейшага ўдзелу ў гэтым выбарчым фарсе знаходзіцца пад вялікім пытаннем. Але для таго каб наша рашэнне мела сур’ёзную палітычную вагу, яно павінна быць кансалідаваным. АДС павінны неадкладна прыступіць да палітычных кансультацый з суб’ектамі, якія ўваходзяць у іншыя кааліцыі», — лічыць апазіцыйны палітык.
Як раней паведаміў Тэлеграф, колькасць апазіцыянераў ва ўчастковых выбарчых камісіях па выбарах дэпутатаў мясцовых саветаў склала 0,15% ад агульнай колькасці чальцоў выбаркамаў пры высунутых 912 кандыдатурах.
«Аднак у выніку ў склад участковых выбаркамаў уключылі ўсяго 100 чалавек. Сярод іх — 31 прадстаўнік Беларускай партыі левых «Справядлівы свет», пяцёра — чальцы Беларускай сацыял-дэмакратычнай партыі (Грамада), 23 — Аб’яднанай грамадзянскай партыі, 17 — Партыі БНФ, 15 — Руху «За Свабоду» і дзевяць чалавек прадстаўляюць аргкамітэт па стварэнні Беларускай партыі жанчын», — распавялі ў прэс-службе.
У той жа час, па дадзеных АДС, палітычныя партыі, што «падтрымліваюць уладу, такія як Беларуская сацыяльна-спартыўная партыя, Аграрная партыя і Камуністычная партыя Беларусі і Рэспубліканская партыя працы і справядлівасці атрымалі ва ўчастковых камісіях 1 333 месцы».