Адвакат Сапелка распавёў пра ўмовы ўтрымання Саннікава ў СІЗА КДБ

18.03.2011 17:29
Архив Редакция

Экс-адвакат былога кандыдата ў прэзідэнты Беларусі Андрэя Саннікава Павел Сапелка распавёў пра ўмовы ўтрымання ў СІЗА КДБ свайго былога падабароннага. Па словах юрыста, у апошні раз Андрэя Саннікава ён бачыў 16 лютага. "Чалавек знаходзіцца ў тых умовах, якія міжнароднымі нормамі вызначаны як "катаванні" — бесчалавечнае, прыніжальнае абыходжанне. Як мінімум", — заявіў Павел Сапелка.

Кажучы пра стан здароўя экс-кандыдата, юрыст сказаў: «Які стан здароўя Андрэя Саннікава — трэба пытацца ў тых, хто далей будзе абараняць яго інтарэсы. Калі яшчэ дакладней: трэба дамагацца таго, каб стан яго здароўя стаў прадметам даследавання, якое будзе адкрытым і падкантрольным грамадству. Трэба дамагацца таго, каб Саннікаў быў рэальна абследаваны медыкамі, і вынікі абследавання былі даведзены, па меншай меры, да яго родных і блізкіх».
 
Акрамя таго, па словах юрыста, з нагоды ўсіх заўважаных ім парушэнняў закона ён звярнуўся ва ўстаноўленым парадку ў органы, у чые абавязкі ўваходзіць ухіленне гэтых парушэнняў, паведамляе «Салiдарнасць».

«Аб выніках гэтага абыходжання, думаю, стане вядома падчас судовага разбору. Калі ён будзе. Вынікі зваротаў, на жаль, складаюць тайну следства», — сказаў Павел Сапелка, дадаўшы, што звароты былі, у тым ліку, наконт прымененых метадаў затрымання і прымененых метадаў следства.
 
Пры гэтым былы адвакат Андрэя Саннікава адзначыў, што ўмовы яго ўтрымання палепшыліся. «Па апошняй інфармацыі, атрыманай ад яго асабіста, ён па-ранейшаму быў у камеры, дзе колькасць змешчаных перавышала колькасць месцаў. Спаў на драўляным шчыце на падлозе. Апісваць іншыя «выгоды» не буду, «заслону сакрэтнасці» ўжо прачынілі іншыя былыя зняволеныя».

Как вам новость?