Нацыянальная каардынацыйная рада дэмакратычнай апазіцыі Беларусі правяла 18 лютага пасяджэнне, падчас якога вырашыла заснаваць працоўныя групы па рэалізацыі Дэкларацыі, прынятай 9 студзеня 2011 года. "Гэтыя групы павінны прапанаваць канкрэтны пералік мерапрыемстваў для зацвярджэння радай", — сказаў намеснік старшыні Аб'яднанай грамадзянскай партыі Леў Марголін.
Па яго словах, арганізацыі, зацікаўленыя ў гэтай праблеме, змогуць далучацца да працы па распрацоўцы такіх мерапрыемстваў і іх ажыццяўленні, піша ucpb.org.
«Першы напрамак — гэта салідарнасць. То бок праца па вызваленні палітвязняў, па рэабілітацыі ахвяр рэпрэсіяў, у тым ліку тых людзей, якія страцілі працу. Таксама гэта далейшая праца з еўрапейскімі структурамі. Уведзенымі санкцыямі пытанне не вычэрпваецца. Трэба і далей аказваць ціск на беларускія ўлады для вызвалення палітвязняў. І то, у якім кірунку дзейнічаць, павінны вырашаць не толькі еўрапейскія структуры, але і прадстаўнікі беларускай апазіцыі», — растлумачыў Леў Марголін.
Другім напрамкам працы з’яўляецца аднаўленне, стварэнне і развіццё інфраструктуры. Напрыклад, Партыю БНФ могуць пазбавіць мінскага офіса, з прычыны чаго ў апазіцыі будуць складанасці з пошукам памяшкання ў сталіцы для правядзення мерапрыемстваў пры ўдзеле вялікай колькасці людзей, адзначыў палітык. Па гэтай прычыне прапануецца набыць або пабудаваць у Мінску офіс, дзе дэмакратычныя сілы маглі б арганізоўваць падобныя сустрэчы. Акрамя таго, прапаноўваецца таксама разам вырашаць пытанні аднаўлення аргтэхнікі, канфіскаванай у арганізацый спецслужбамі падчас ператрусаў.
«Трэці напрамак — будучая выбарчая кампанія. Крыху больш за год засталося да парламенцкіх выбараў, і было б нядрэнна выпрацаваць па гэтым пытанні адзіную пазіцыю. Тое, што мы будзем удзельнічаць у гэтай кампаніі — гэта зразумела, але ўдзел можа быць розным, у тым ліку — байкот выбарчай кампаніі. Трэба распрацаваць агульныя ўмовы, якія мы маглі б вылучыць уладам, і вызначыць пэўную дату іх выканання. Затым прыняць рашэнне: вылучаць сваіх кандыдатаў ці байкатаваць гэтую кампанію», — працягнуў намеснік кіраўніка АГП.
Чацвертым напрамкам дзейнасці павінна стаць інфармацыйная кампанія. Гэта ўключае ў сябе як агульнае інфармаванне жыхароў краіны аб тым, што адбылося ў дзень прэзідэнцкіх выбараў і пасля іх, так і стварэнне канкрэтнага фільма аб гэтых падзеях.
«Павінен быць фільм, які даваў бы ацэнку сітуацыі ў цэлым, пачынаючы са збору подпісаў, агітацыйнай кампаніі, уключаючы ход выбараў, іх фальсіфікацыі. Каб у людзей не складалася ўражанне, што плошча — гэта нейкае асобнае мерапрыемства кімсьці інспіраванае. Гэта падзея, якая вынікала з усёй логікі выбарчай кампаніі. Людзі выйшлі на плошчу не таму, што іх туды нехта клікаў, хтосьці ім праплочваць, а таму што гэта быў іх унутраны парыў. Гэта быў адказ на тыя дзеянні, якія ажыццяўлялі ўлады», — патлумачыў Леў Марголін.
Пятым напрамкам дзейнасці апазіцыі абраная арганізацыя масавых мерапрыемстваў — асабліва пры ўдзеле тых арганізацый, якія падпісалі новую Дэкларацыю апазіцыі. Асобным пунктам тут з’яўляецца стварэнне групы аховы парадку, якая прымала б меры для спынення спробаў правакацый на мерапрыемствах.
«І апошні, шосты кірунак, — гэта праца з мэтавай аўдыторыяй. У кожнай арганізацыі, у кожнай партыі, у кожнага грамадскага аб’яднання ёсць свая мэтавая група, з якой яны размаўляюць, чые інтарэсы абараняюць, і гэтая праца таксама павінна быць скаардынаваная», — падагульніў Леў Марголін.
Удзельнікі пасяджэння вырашылі, што кожны з пералічаных вышэй напрамкаў будуць развіваць арганізацыі, якіх зацікавіць тая ці іншая праблема. Чарговае пасяджэнне Нацыянальнай каардынацыйнай рады дэмакратычнай апазіцыі прызначана на 28 лютага.
Як ужо перадаваў Тэлеграф, 9 студзеня, у Мінску прадстаўнікі беларускай апазіцыі прынялі Дэкларацыю аб сітуацыі ў Беларусі, а таксама аб’явілі аб стварэнні Нацыянальнай каардынацыйнай рады дэмакратычнай апазіцыі.
