Апытанне: 77,7% беларусаў лічаць прызнанне выбараў палітычным пытаннем

09.11.2010 15:22
Архив

Большасць беларусаў лічыць палітычным пытаннем прызнанне або непрызнанне вынікаў прэзідэнцкіх выбараў замежнымі краінамі, на пазіцыю міжнароднай супольнасці не ўплываюць дзеянні беларускага боку. Такога меркавання прытрымліваюцца 77,7% удзельнікаў рэспубліканскага сацыялагічнага даследавання, праведзенага ў кастрычніку 2010 года аналітычным цэнтрам EcooM.

У тым, што Беларусь можа ўплываць на рэакцыю замежных краін на вынікі выбараў, перакананыя 16% апытаных. Не змаглі адказаць на пытанне сацыёлагаў 2,6% рэспандэнтаў, 3,7% не далі адказу, перадае БелТА.

Пры гэтым 20,8% рэспандэнтаў спакойна паставяцца да сітуацыі, калі міжнародныя назіральнікі не прызнаюць вынікі прэзідэнцкіх выбараў. Гэта рашэнне расстроіць 0,1% апытаных. Адмоўна да яго ставяцца 28,6% рэспандэнтаў, станоўча — 6%. Не змаглі выказаць сваё стаўленне да непрызнання выбараў у Беларусі з боку міжнароднай супольнасці 4,3% удзельнікаў апытання, 38,5% не далі адказу.

Апытанне: 64,6% беларусаў лічаць, што вынікі выбараў не залежаць ад кіраўніцтва Расіі

Адказваючы на пытанне аб тым, ці прызнае Расія выбары ў Беларусі, 21,2% рэспандэнтаў адзначылі «так», 12,6% — «хутчэй так», 10,8% — «не», 18,4% — «хутчэй не», 29,7% —  «цяжка адказаць», 7,3% — «няма адказу».

На думку 64,6% грамадзян, вынікі будучых выбараў не залежаць ад пазіцыі кіраўніцтва Расіі.

33,6% апытаных лічаць, што Еўрапейскі саюз прызнае выбары, 22,4% — што хутчэй прызнае. Процілеглага меркавання прытрымліваюцца 11,5% удзельнікаў сацапытання («хутчэй не»), 8,1% («не»). Не змаглі адказаць на пытанне 19,2% апытаных, не далі адказу 5,2%.