Арганізатары акцыі "Стоп бензін", якая прайшла 7 чэрвеня, задаволеныя яе вынікам. Аднак у выпадку чарговага росту коштаў на бензін, акцыя можа паўтарыцца. "Так, Аляксандр Лукашэнка даволі хутка адрэагаваў на акцыю. Мабыць ён гэта зрабіў, каб вярнуць давер людзей", — заявіў ініцыятар акцыі, кіраўнік інфармацыйна-асветніцкай установы "За аўто" Арцём Шаркоў.
«Тыпу, усе рашэнні прымаліся без яго ведама і цяпер трэба вярнуць сітуацыю ў нармальнае рэчышча. Ён распарадзіўся, каб цэны на паліва вярнуліся да больш-менш прымальнага ўзроўню. Каб людзі не даходзілі да мяжы. Але кошты на бензін ўсё роўна павышаны, а грошай ў людзей больш не стала. Аднак галоўнае — мы былі пачутыя», — адзначыў Арцём Шаркоў, перадае «Ежедневник».
«Упершыню за 17 гадоў адразу пасля акцыі пратэсту з’явіўся вынік — гэта відавочна. І калі нехта будзе займацца іншымі пытаннямі, выкарыстоўваць падобныя метады і яны апынуцца эфектыўныя, то няхай. Гэта патрэбна і карысна. Аднак мы займаемся выключна праблемамі аўтааматараў і ў іншыя тэмы не лезем», — сказаў ініцыятар акцыі.
Шаркоў: праводзіць прама цяпер паўторную акцыю няма неабходнасці
«Аднак мы будзем глядзець, як адрэагуюць улады на іншыя пытанні, якія ставіліся намі падчас акцыі. У прыватнасці, аб прадстаўленні людзям калькуляцыі фармавання кошту на аўтамабільнае паліва ў Беларусі», — паведаміў лідар «За аўто».
«Усё залежыць, перш за ўсё, ад саміх аўтааматараў. Калі людзі вырашаць, што неабходна выязджаць на вуліцы, акцыя зноў адбудзецца», — адзначыў Арцём Шаркоў.
Ён таксама распавёў, што ўдзельнікі акцыі будуць дапамагаць тым, каго аштрафавалі супрацоўнікі ДАІ. У прыватнасці, ужо пачаўся збор сродкаў на аплату штрафаў. Лідар «За аўто» выказаў сумнеў у тым, што ўлады прыцягнуць да адказнасці ўсіх удзельнікаў акцыі.
«Па нашых падліках у акцыі ўзяло ўдзел каля 1600 машын. Усіх кіроўцаў не знойдуць. А калі і знойдуць, то акцыя праводзілася ў рамках прававога поля. Не парушалася ні крымінальнае, ні адміністрацыйнае заканадаўства, ні нават правілы дарожнага руху. Таму ў міліцыі няма падстаў каго-небудзь з удзельнікаў акцыі штрафаваць. Але калі такое будзе адбывацца, мы гатовыя кансультаваць людзей, як пазбегнуць гэтых санкцый», — сказаў ён.
Як раней паведамляў Тэлеграф, у ноч на 7 чэрвеня канцэрн «Белнафтахім» падняў раздробныя кошты на аўтамабільнае паліва. Кошт ДТ склаў 5100 рублёў за літр, бензіну А92 — 5100 рублёў за літр, А95 — 5800 рублёў за літр, А80 — 4950 рублёў за літр. У сярэднім цэны на нафтапрадукты, што рэалізуюцца праз АЗС, павялічыліся на 31%.
У адказ на гэта ў Мінску ўвечары 7 чэрвеня прайшла маштабная акцыя пратэсту аўтааматараў, у якой, па ацэнцы, арганізатараў удзельнічала каля 1,6 тыс. чалавек.
На наступны дзень прэзідэнт Беларусі Аляксандр Лукашэнка распарадзіўся знізіць з раніцы 9 чэрвеня кошты на паліва для аўтамабіляў. «Давайце дамовімся: паліва з заўтрашняе раніцы будзе не 5,2-5,1 тыс. рублёў, а максімум 4,5 тыс. рублёў», — заявіў ён.
