У затрыманых беларускай міліцыяй няма абсалютна ніякіх грамадзянскіх правоў, лічыць фотакарэспандэнт пецярбургскай газеты «Мой раён» Аляксандр Астаф'еў. Такую заяву журналіст зрабіў пасля таго, як прабыў некалькі дзён у беларускім СІЗА. Туды ён трапіў пасля затрымання супрацоўнікамі спецназа падчас дэманстрацыі 19 снежня ў Мінску.
«Самае брыдкае ў дадзенай сітуацыі звязана не са мной, а з самімі беларусамі. Таму што як толькі беларус аказваецца ў МУС у такой сітуацыі, ён пазбаўляецца абсалютна ўсіх грамадзянскіх правоў: да яго ставяцца, як да ворага. Яго перамяшчаюць, як прадмет; ён не ведае, куды яго павязуць; не паведамляюць сваякам, дзе ён і што з ім», — так журналіст пракаментаваў «Рускай службе навін» падзеі пасля выбараў у Беларусі.
«У такіх умовах з чалавекам можа адбыцца ўсё што заўгодна: няма інфармацыі — няма чалавека. Мне ў гэтай сітуацыі вельмі пашанцавала», — лічыць журналіст.
Як ужо перадаваў Тэлеграф, падчас акцыі пратэсту пасля прэзідэнцкіх выбараў 19 снежня ў Мінску спецназ збіваў і затрымліваў дэманстрантаў, сярод якіх знаходзіліся і журналісты, што асвятлялі падзеі. У прыватнасці, былі збітыя аператары расійскага тэлеканала RT Антон Харчанка і Філяеў Віктар, апынуўся затрыманым фотакарэспандэнт пецярбургскай газеты «Мой раён» Аляксандр Астаф’еў.
Апошні пасля затрымання абвясціў на знак пратэсту галадоўку і запатрабаваў сустрэчы з супрацоўнікамі расійскай амбасады. Журналіст прабыў некалькі дзён у прыёмніку-размеркавальніку на вуліцы Акрэсціна ў Мінску. Пасля ўмяшання расійскіх дыпламатаў Аляксандра Астаф’ева вызвалілі. Іншыя расійскія грамадзяне, затрыманыя на акцыі апазіцыі, застаюцца пад арыштам. Некаторых з іх пакаралі пазбаўленнем волі на 10-15 сутак.
