Асуджаныя за "маўклівую акцыю" спадзяюцца на дапамогу для выплаты штрафаў

24.06.2011 12:32
Архив

Удзельнікі акцыі маўклівай салідарнасці, якіх затрымалі ўвечары 22 чэрвеня і прысудзілі да буйных штрафаў на наступны дзень, спадзяюцца, што грамадскасць акажа ім фінансавую дапамогу. Пра гэта паведаміў адзін з асуджаных, які пажадаў заставацца ананімным. Маскоўскі суд Мінску прысудзіў яго да штрафу ў памеры 25 базавых велічынь (875 тыс. рублёў, або 176 даляраў).

24-гадовы малады чалавек, які працуе ў будаўніцтве, распавёў, яго разам з іншымі супрацоўнікі міліцыі адціскалі ад рэстарана McDonald’s каля станцыі метро «Кастрычніцкая» ў кірунку плошчы Свабоды. Паводле яго слоў, людзі абураліся. «Што мы — бараны, што нас гоняць?» — казалі яны. Малады чалавек спытаў, чаму людзей не прапускаюць у цэнтр горада, аднак замест адказу работнік спецназа ударыў яго ў вобласць печані, паведамляе БеаПАН.

Калі ж пацярпелы прысеў на лаўку ў скверы на вуліцы Леніна, яго затрымалі і разам з іншымі затрыманымі даставілі ў Цэнтр ізаляцыі правапарушальнікаў ГУУС Мінгарвыканкама. Там у людзей апісалі маёмасць, знялі адбіткі пальцаў, сфатаграфавалі і запісалі на відэа, склалі пратакол за дробнае хуліганства, а затым адвезлі ў Маскоўскае РУУС, дзе людзі чакалі суда.

Як ужо перадаваў Тэлеграф, 23 чэрвеня мінскія суды вынеслі прысуды 23 удзельнікам акцыі маўклівай салідарнасці, якая прайшла напярэдадні. Усіх затрыманых абавязалі выплаціць штрафы ў памеры ад 2 да 30 базавых велічынь (ад 14 да 210 даляраў). Іх абвінавачваюць у здзяйсненні дробнага хуліганства, прадугледжанага артыкулаў 17.1 КаАП Беларусі.