Частка паставак венесуэльскай нафты для Беларусі ў ліпені будзе ажыццяўляцца праз порт Эстоніі. Гэта звязана з тым, што Адэскі порт не спраўляецца з аб'ёмамі вуглевадароднай сыравіны, якая паступае з паўднёваамерыканскай краіны. Гандлёвы марскі порт Адэсы можа прыняць максімум чатыры танкера на месяц.
У ліпені чакаецца прыбыццё яшчэ трох танкераў з венесуэльскай нафтай гатунку «Санта-Барбара» агульным аб’ёмам каля 240 тыс. тон, паведамляе «Комсомольская правда в Беларуси».
У Беларускай нафтавай кампаніі паведамілі, што частка танкераў з 80 тыс. тон нафты ў ліпені прыбудуць у адзін з партоў Эстоніі, дакладная назва якога пакуль не ўдакладняецца. Нафту перагрузіць ў рэзервуары на сушы, а потым чыгуначным транспартам адправяць у Беларусь — на перапрацоўчыя заводы ў Мазыры ці Наваполацку.
Раней беларускі бок дамовіўся з кіраўніцтвам Украіны аб тым, што за 12 месяцаў гэтага года праз марскі гандлёвы порт Адэсы будзе пастаўлена для перапрацоўкі на Мазырскі НПЗ каля чатырох мільёнаў тон венесуэльскай нафты.