Міжурадавае пагадненне аб парадку ўзаемных паездак жыхароў памежных тэрыторый Беларусі і Літвы падпісана 20 кастрычніка ў Мінску ў прысутнасці прэзідэнтаў дзвюх краін. Подпісы пад дакументам паставілі міністры замежных спраў Беларусі і Літвы.
У ходзе брыфінгу па выніках перамоваў прэзідэнт Беларусі Аляксандр Лукашэнка назваў падпісанне пагаднення «знакавай падзеяй для абедзвюх краін». «У найбліжэйшай будучыні сотні тысяч жыхароў памежжа Беларусі і Літвы атрымаюць права перасякаць дзяржаўную мяжу ў спрошчаным парадку. Актывізацыя асабістых кантактаў — важны фактар далейшага развіцця не толькі гуманітарных і эканамічных сувязяў паміж рэгіёнамі, але і беларуска-літоўскіх адносін у цэлым», — лічыць беларускі лідар, перадае БелТА.
Акрамя таго, беларускі лідар выказаў надзею, што падпісанае пагадненне паміж Літвой і Беларуссю дапаможа ў вырашэнні праблемы «па зняцці нікому не патрэбных візавых бар’ераў паміж Беларуссю і ЕС».
У сваю чаргу прэзідэнт Літвы Даля Грыбаўскайце адзначыла, што спрашчэнне парадку перасячэння дзяржмяжы не прывядзе да павелічэння патокаў кантрабанды. «У першую чаргу гэта пагадненне накіравана на тое, каб людзі, якія жывуць у памежных раёнах Беларусі і Літвы, маглі вольна перамяшчацца і мець зносіны адно з адным. Кошт доўгатэрміновай візы складзе 20 еўра, што ў тры разы танней, чым было да гэтага часу», — сказала Даля Грыбаўскайце.
Мартынаў: пагадненне закране да 1,5 млн. чалавек
Між тым міністр замежных спраў Беларусі Сяргей Мартынаў растлумачыў, што падпісанае пагадненне закране да 1,5 млн. чалавек у прыкладна 50-кіламетровай паласе з кожнага боку мяжы.
«Гэта вельмі вялікі крок наперад. Мы лічым, што гэта не толькі будзе азначаць больш шырокія магчымасці для кантактаў людзей, што само па сабе важна, але таксама будзе стымуляваць эканамічны зварот», — сказаў кіраўнік знешнепалітычнага ведамства.
