Беларусь разлічвае на паспяховую рэалізацыю праектаў з Венесуэлай. Пра гэта 8 лістапада заявіў прэзідэнт Беларусі Аляксандр Лукашэнка на сустрэчы з міністрам замежных спраў Венесуэлы Нікаласам Мадурам Морасам. "Я прашу перадаць самыя добрыя словы сябру Уга Чавесу. Скажыце яму, што мы маем намер рэалізаваць усе дамоўленасці, дасягнутыя ў ходзе нашай апошняй сустрэчы", — сказаў беларускі лідар.
Паводле слоў Аляксандра Лукашэнкі, беларускі бок гатовы абмеркаваць усе пытанні па выпрацоўцы новых прапаноў па двухбаковым супрацоўніцтве і выслухаць усе прапановы венесуэльскага боку, перадае БелТА.
«Я ведаю, вы маеце даручэнне ад прэзідэнта Венесуэлы на абмеркаванне шэрагу пытанняў у Беларусі. Я гатовы таксама абмеркаваць пажаданні, прапановы прэзідэнта Венесуэлы, абмеркаваць праблемы», — адзначыў прэзідэнт Беларусі.
Аляксандр Лукашэнка перакананы, што пасля нядаўняга наведвання Беларусі прэзідэнтам Венесуэлы Уга Чавесам цяперашні візіт венесуэльскай дэлегацыі з’яўляецца «добрым візітам пасля такой буйнамаштабнай сустрэчы». «Я думаю, ён дасць свае станоўчыя вынікі», — заявіў беларускі лідар.
МЗС Венесуэлы: мы ідзем добрым тэмпам
У сваю чаргу кіраўнік МЗС Венесуэлы адзначыў, што дасягнутыя раней дамоўленасці ў галіне энергетыкі паміж Беларуссю і Венесуэлай ўжо атрымалі развіццё. «Я ўпэўнены, што мы ідзем вельмі добрым тэмпам», — падкрэсліў Нікалас Мадура Морас. Галоўнай жа мэтай гэтага візіту міністр замежных спраў Венесуэлы назваў умацаванне тых пазіцый, пытанняў, якія абмяркоўваліся на вышэйшым узроўні ў час нядаўняга візіту ў краіну венесуэльскага лідара. «Я прывёз найлепшыя пажаданні ад Уга Чавеса і шэраг важных тэмаў у развіццё перамоў, якія адбыліся тут падчас візіту прэзідэнта», — заявіў Нікалас Мадура Морас.
Пагадненне аб гандлёва-эканамічным супрацоўніцтве паміж урадамі Беларусі і Венесуэлы было падпісана ў снежні 2007 года. З тых часоў таваразварот паміж краінамі істотна павялічыўся за кошт павелічэння аб’ёмаў паставак і пашырэння наменклатуры прадукцыі, якая пастаўляецца, паведамілі ў МЗС Беларусі.
Так, у 2009 годзе таваразварот Беларусі з Венесуэлай у параўнанні з 2008 годам павялічыўся на 33,1% і склаў 230,6 млн. даляраў. Імпарт знізіўся ў дзевяць разоў і склаў 15,9 тыс. даляраў. Склалася дадатнае сальда для Беларусі ў памеры 230,6 млн. даляраў.
У 2010 годзе рэзка павялічыўся імпарт з Венесуэлы ў сувязі з пачаткам закупак венесуэльскай нафты. У студзені — верасні 2010 года беларускі экспарт склаў 232,3 млн. даляраў, у той час як імпарт павялічыўся да 648,1 млн. даляраў.
Як раней перадаваў Тэлеграф, 15-18 кастрычніка 2010 года адбыўся візіт прэзідэнта Венесуэлы Уга Чавеса ў Мінск, у ходзе якога было падпісана некалькі двухбаковых дакументаў, у тым ліку кантракт на пастаўку нафты ў 2011-2013 гадах. Акрамя таго, у ходзе нядаўняга візіту намесніка міністра замежных спраў Беларусі Сяргея Алейніка ў Сірыю кіраўнікі знешнепалітычных ведамстваў Беларусі, Венесуэлы і Сірыі падпісалі сумесную дэкларацыю аб супрацоўніцтве.
