Па ўзроўні росту за студзень-ліпень 2010 года афіцыйнага курсу даляра ў адносінах да нацыянальнай валюты Беларусь заняла сёмае месца сярод постсавецкіх краінаў. За дадзены перыяд кошт амерыканскай валюты вырас у краіне амаль на 4%.
Першыя тры месцы належаць прыбалтыйскім дзяржавам — Латвіі, Эстоніі і Літве, у якіх курс даляра павялічыўся ў сярэднім на 10%. Наступныя тры месцы падзялілі паміж сабой — Грузія, Узбекістан і Кыргызстан, перадае БелаПАН.
Нязначна (менш чым на 0,25%) курс даляра вырас у Таджыкістане і Азербайджане. У Туркменістане кошт гэтай валюты не змяняўся, а ў Расіі, Малдове, Казахстане і Украіне — нават паменшыўся.
Як раней паведамляў Тэлеграф, па выніках таргоў замежнымі валютамі на Беларускай валютна-фондавай біржы першага ліпеня курс даляра павялічыўся на 3 рублі ў параўнанні з папярэднім значэннем. Паводле курсу Нацбанка, у пятніцу, другога ліпеня, даляр каштаваў 3023 рублі і абнавіў тым самым гістарычны максімум.
