Беларусь пагодзіцца стварыць сумеснае з Расіяй прадпрыемства па экспарце электраэнергіі з будучай беларускай АЭС толькі ў тым выпадку, калі гэта будзе адпавядаць нацыянальным інтарэсам краіны. Пра гэта 14 кастрычніка заявіў намеснік міністра энергетыкі Беларусі Міхаіл Міхадзюк.
Намеснік кіраўніка мінэнерга паведаміў, што ў цяперашні час бакі працягваюць праводзіць кансультацыі па дадзеным пытанні і спрабуюць высветліць, ці супадае іх бачанне працы сумеснага прадпрыемства, перадае БелТА.
Міхаіл Міхадзюк таксама адзначыў, што стварэнне сумеснага прадпрыемства Расія не разглядае ў якасці непасрэднай умовы прадстаўлення крэдыту Беларусі на будаўніцтва АЭС.
«Расійскі бок не разглядае гэта як умову выдзялення крэдыту. Не, я не кажу, што яны гатовыя без СП вылучыць крэдыт, проста цяпер гэта не разглядаецца як умова выдзялення крэдыту. Сёння гэтае пытанне абмяркоўваецца ў рамках пагаднення аб паралельнай працы нашых энергасістэмаў», — падкрэсліў намеснік міністра энергетыкі Беларусі.
