Прэзідэнт Беларусі Аляксандр Лукашэнка паведаміў трэцяга ліпеня. што беларускі бок ратыфікаваў Мытны кодэкс і ўсе астатнія дакументы, неабходныя для запуску Мытнага саюза ў трохбаковым фармаце. Беларускі лідар таксама пракаментаваў выказванні свайго расійскага калегі Дзмітрыя Мядзведзева, які назваў яго адкрытыя лісты ў расійскія СМІ і найбуйнейшым бізнэсоўцам Расіі "спамам".
Кіраўнік беларускай дзяржавы выказаў шкадаванне з нагоды таго, што «прэзідэнт саюзнай дзяржавы не ведае, што адбываецца ў Мытным саюзе», і падкрэсліў, што Беларусь «ні на цалю не зрабіла кроку назад, ні на міліметр не адстае ў Мытным саюзе ні ад Расіі, ні ад Казахстана», перадае БелТА.
«Мы на сённяшні дзень ратыфікавалі ўсе дамовы і пагадненні, якія датычацца МС. Але яны гэтага не ведаюць. Гарантыю вам даю, што не ведаюць. У адваротным выпадку, не было б гэтай балбатні па тэлевізары. Мытны кодэкс мы ратыфікавалі. Мы сёння ў той жа сістэме каардынатаў, што і яны», — заявіў прэзідэнт Беларусі.
Па словах Аляксандра Лукашэнкі, заява Дзмітрыя Мядзведзева, зробленае раніцай трэцяга ліпеня, можа сведчыць аб тым, што «загаварыўся чалавек, трэба супакоіцца і паглядзець на той свет, які яго акаляе, і свет, у якім мы жывем».
«Не хвалюйцеся, іх справа казаць: ім бліноў хочацца, ім каўбасы хочацца, масла, напэўна. Цяпер настаў час казаць пра нейкія лісты. Гэта ж не падмётные лісты — гэта адкрытыя прамыя лісты. І я маю права як старшыня Вышэйшага Дзяржсавета Саюзнай дзяржавы, аб якім так марылі расійцы і беларусы, казаць тое, што я лічу патрэбным», — сказаў беларускі лідар.
«Мы не забараняем Мядзведзеву таксама казаць тое, што ён лічыць патрэбным. Ён і кажа, толькі гэта трэба рабіць прафесійна, з веданнем справы», — адзначыў кіраўнік беларускай дзяржавы.
Мядзведзеў: Мытнаму саюзу не хапае палітычнай падтрымкі
За некалькі гадзін да заявы Аляксандра Лукашэнкі, які паведаміў аб ратыфікацыі Беларуссю ўсіх дакументаў па Мытным саюзе, прэзідэнт Расіі заявіў, што новаму ўтварэнню не хапае, перш за ўсё, палітычнай падтрымкі з боку беларускага кіраўніцтва, перадае РИА «Новости».
«Галоўнае, каб была палітычная падтрымка. Гэта нават не ў маёй кампетэнцыі, а ў кампетэнцыі нашага калегі (Аляксандра Лукашэнкі — Тэлеграф). Гэта значна больш карысна, чым спамам займацца — лісты рассылаць, я маю на ўвазе», — сказаў Дзмітры Мядзведзеў.
