У цяперашні час Беларусь не можа далучыцца да Канвенцыі ААН па касетных боепрыпасах. Пра гэта заявіў прадстаўнік міжнароднай кампаніі за забарону касетных боепрыпасаў, дырэктар ГА "Цэнтр СКАФ", член Грамадска-кансультацыйнага савета пры Адміністрацыі прэзідэнта Беларусі Юры Загуменнаў.
1 жніўня ўступіла ў сілу Канвенцыя ААН па касетных боепрыпасах. Яна была падпісаная ў Дубліне 30 траўня 2008 года і адкрыта для далучэння ў Осла ў снежні 2008 года. На сённяшні дзень 107 краінаў далучыліся да канвенцыі, 37 з іх ужо ратыфікавалі яе, перадае БелаПАН.
Згодна з гэтай канвенцыі, кожная краіна-удзельніца абавязуецца ніколі і ні пры якіх абставінах не ўжываць касетныя боепрыпасы, а таксама не распрацоўваць, не вырабляць, не набываць іншым чынам, не назапашваць, не захоўваць і не перадаваць нікому, проста ці апасродкавана, касетныя боепрыпасы.
Як распавёў Юры Загуменнаў, Беларусь падзяляе гуманітарныя мэты дадзенай канвенцыі, аднак пакуль не можа прыняць яе абавязацельствы, улічваючы жорсткія рамкі дакументу, у прыватнасці па тэрмінах знішчэння касетных боепрыпасаў.
Па-першае, сказаў Юры Загуменнаў, гэта абумоўлена меркаваннямі нацыянальнай бяспекі. Па-другое, растлумачыў спецыяліст, у краіны цяпер ёсць больш прыярытэтная задача, а менавіта, знішчэнне ў рамках Отаўскай канвенцыі арсеналу супрацьпяхотных мінаў тыпу ПФМ-1, які ў цяперашні час налічвае 3,5 млн. адзінак.
Па словах Юрыя Загуменнава, з гэтай задачай не ўдаецца справіцца з 2004 года. Еўракамісія правяла ўжо два тэндэры, але так і не змагла вызначыцца з выканаўцам працаў, на якія гатовая вылучыць чатыры мільёны еўра. Па ўмовах дамовы, утылізацыю беларускіх запасаў ПФМ-1 павінны былі завяршыць у 2008 годзе.