Беларусь стане адной з першых замежных дзяржаў, што закупяць расійскія ракетныя комплексы новага пакалення С-400 "Трыумф". "Безумоўна, адной з першых краін, якая атрымае сыстэмы С-400 "Трыумф", будзе Беларусь, калі яна гэтага захоча", — заявіў 29 чэрвеня намеснік дырэктара Федэральнай службы па ваенна-тэхнічным супрацоўніцтве (ФСВТС Расіі) Канстанцін Бірулін.
Пры гэтым ён адзначыў, што Расія ўсталявала пэўны мараторый на продаж «Трыумф» за мяжу. Зроблена гэта, па словах Канстанціна Біруліна, «у сувязі з неабходнасцю забяспечыць, у першую чаргу, запатрабаванні ўласнай арміі ў гэтай сістэме», перадае «Інтэрфакс».
«Што тычыцца экспартных паставак С-400 «Трыумф», то яны, па нашых прагнозах, могуць пачацца прыкладна з 2013 года, калі мы выйдзем на нармальныя аб’ёмы вытворчасці гэтай сістэмы», — растлумачыў ён.
Даведка:
ЗРС З-400 «Трыумф» здольны перахапляць усе сучасныя сродкі паветранага нападу, у тым ліку малапрыкметныя самалёты, беспілотныя лятальныя апараты, балістычныя і крылатыя ракеты. Інструментальная далёкасць выяўлення цэляў З-400 складае 600 кіламетраў. Сістэма можа выкарыстаць як ракеты зенітна-ракетнага комплексу С-300, так і свае ўласныя. На ўзбраенні С-400 знаходзяцца штатныя ракеты і ракеты звышвялікай далёкасці. Устаноўленыя на ракетах мікрарухавікі дазваляюць ім манеўраваць на вышынях да 35 кіламетраў пры перагрузках звыш 20 адзінак.