Беларусь у абмен на нафту паставіць Венесуэле малако і трактары

22.11.2010 09:13
Архив

Дэлегацыя Беларусі ў складзе міністраў прамысловасці Аляксандра Радзевіча, будаўніцтва і архітэктуры Аляксандра Селязнёва, сельскай гаспадаркі і харчавання Міхаіла Русага і кіраўнікоў шэрагу прадпрыемстваў падпісала ў Каракасе з уладамі Венесуэлы дамоўленасці, па якіх тыя закупяць 16 тыс. тон сухога малака, сельгастэхніку і транспарт, паведаміў кіраўнік МЗС Венесуэлы Нікалас Мадура.

Паводле яго слоў, Венесуэла набудзе 570 беларускіх трактароў, а таксама грузавікі, самазвалы і аўтацыстэрны. Усяго Каракасу мяркуюць паставіць 2 тыс. беларускіх трактароў, перадае РИА «Новости».

Акрамя таго, Беларусь дапаможа Венесуэле ў будаўніцтве трох аграпрамысловых комплексаў па гадоўлі і перапрацоўцы сельгаспрадукцыі.

Эканамічнае супрацоўніцтва дзвюх краін будуецца на ўзаемавыгаднай аснове, адзначыў Нікалас Мадура.

Як паведамляў Тэлеграф, дамова аб пастаўцы нафты з Венесуэлы ў Беларусь была падпісана 17 сакавіка 2010 года. Паводле дакументаў, Венесуэла ў 2010 годзе паставіць у Беларусь чатыры мільёны тон нафты. 16 кастрычніка ў ходзе візіту прэзідэнта Венесуэлы Уга Чавеса ў Беларусь ЗАТ «Беларуская нафтавая кампанія» і кампанія Petroleos de Venezuela падпісалі кантракт на пастаўку нафты ў 2011 — 2013 гадах. Згодна з дамовай, штогадовыя пастаўкі нафты з Венесуэлы ў Беларусь могуць дасягаць дзесяці мільёнаў тон.