У адпаведнасці з указам прэзідэнта Беларусі Аляксандра Лукашэнкі № 480 у 2010-2015 гадах на развіццё малочнай галіны краіны будзе выдаткавана 17,9 трлн. рублёў (больш за 5,9 млрд. даляраў). Гэтыя сродкі пойдуць на развіццё вытворчасці малака і малакаперапрацоўчых прадпрыемстваў, гаворыцца ў дакуменце.
З гэтай сумы на будаўніцтва малочнатаварных фермаў вылучаецца 10,1 трлн. рублёў, рэканструкцыю фермаў — 3 трлн. рублёў, будаўніцтва і рэканструкцыю памяшканняў для маладняку буйной рагатай жывёлы — 3,2 трлн. рублёў, на будаўніцтва, рэканструкцыю і мадэрнізацыю малакаперапрацоўчых прадпрыемстваў — 1,6 трлн. рублёў.
Узгодненая прэзідэнтам Рэспубліканская праграма развіцця малочнай галіны ў 2010-2015 гадах прадугледжвае, што за кошт вылучэння малочнай галіны 17,9 трлн. рублёў вытворчасць малака ў сельскагаспадарчых арганізацыях павялічыцца ў 2015 годзе да ўзроўню 2009 года ў 1,46 раза і складзе 8,1 млн. тон з пастаўкай 7,4 млн. тон малочнай сыравіны на перапрацоўчыя прадпрыемствы.
Рост аб’ёмаў вытворчасці малочнай сыравіны плануецца забяспечыць як за кошт павелічэння пагалоўя кароў да 1,35 млн., так і шляхам павышэння іх прадукцыйнасці да 6000 кг на год, або ў 1,27 раза больш у параўнанні з 2009 годам.
У гэтых мэтах прадугледжваецца будаўніцтва 476 малочнатаварных фермаў на 342,5 тыс. жывёламесцаў, рэканструкцыя 1 256 фермаў на 416,3 тыс. жывёламесцаў, а таксама будаўніцтва і рэканструкцыя 2 172 памяшканняў для маладняку буйной рагатай жывёлы.
Указ прадугледжвае, што ў 2015 годзе сумарныя вытворчыя магутнасці па перапрацоўцы малака дасягнуць 8,2 млн. тон на год. Вытворчасць сыроў складзе 180 тыс. тон (на 1 студзеня 2010 года — 140 тыс. тон), сухіх малочных прадуктаў — 270 тыс. тон (161 тыс. тон), натуральнамалочнай прадукцыі ў пераліку на малако — 2 000 тыс. тон (1 938 тыс. тон). Таксама мяркуецца рэалізацыя мерапрыемстваў па рацыянальным выкарыстанні малочнай сыроваткі (яе аб’ёмы ў 2015 годзе складуць каля 2,4 млн. тон).
Дакумент уступае ў сілу з дня яго афіцыйнага апублікавання.
