Беларусь і Украіна дамовіліся прапрацаваць тэхнічныя і эканамічныя аспекты транспартоўкі венесуэльскай нафты на беларускія НПЗ. Бакі абмеркавалі маршрут транзіту нафты па трубаправодзе з порта Адэсы ў Крамянчуг і адтуль ужо па чыгунцы на Мазырскі НПЗ, у тым ліку і з выкарыстаннем схемаў замяшчэння нафты з улікам яе якасці.
Як расказалі ў міністэрстве паліва і энергетыкі Украіны, такая дамоўленасць была дасягнута 17 чэрвеня ў ходзе перамоваў прадстаўнікоў мінпалэнерга Украіны, «Нафтагаза Украіны», канцэрна «Белнафтахім» і прадпрыемства «Гомельтранснафта Дружба».
Пратакол дамоўленасцяў падпісалі намеснік міністра паліва і энергетыкі Украіны Ігар Кірушын, намеснік старшыні праўлення НАК «Нафтагаз Украіны» Яўген Карняйчук, намеснік старшыні канцэрна «Белнафтахім» Уладзімір Волкаў і генеральны дырэктар РУП «Гомельтранснафта Дружба» Сяргей Сасноўскі, паведамляе «Еўрапейскае радыё для Беларусі».
Акрамя дасягнутай дамоўленасці бакі разглядаюць таксама магчымасць выкарыстання прафіцыту прапускной здольнасці трубаправода «Адэса-Броды» для паставак нафты, блізкай па якасці да Urals, на Мазырскі НПЗ па маршруце порт «Паўднёвы»-Броды-Мазырскі НПЗ.
Чарговы танкер з венесуэльскай нафтай для Беларусі прыбудзе ў порт Адэсы 19-20 чэрвеня
У дыспетчарскай Адэскага порта паведамілі, што чарговы танкер з Венесуэлы «Мінерва Сафія» з 80 тыс. тон нафты гатунку «Санта-Барбара» прыбудзе ў порт 20 чэрвеня. Па словах дыспетчара, афіцыйна прыбыццё прызначана на 12:00.
Аднак, у порце Адэсы не выключаюць, што танкер можа прыбыць раней — 19 чэрвеня, перадае БелаПАН. Акрамя гэтага, 29 чэрвеня чакаецца прыбыццё яшчэ аднаго танкера з Венесуэлы з 80 тыс. тон нафты той жа маркі для перапрацоўкі на Мазырскім НПЗ.
Як ужо паведамляў Тэлеграф, гэта ўжо другая партыя венесуэльскай нафты. Як расказалі ў ЗАТ «Беларуская нафтавая кампанія», груз чакаюць у порце Адэсы, меркавана, 20 чэрвеня, а на Мазырскі нафтаперапрацоўчы завод нафта паступіць да 15 ліпеня.
Першую партыю нафты даставілі ў марскі порт Адэсы ў канцы красавіка гэтага года. З украінскага горада нафту ў чыгуначных цыстэрнах перавезлі ў Мазыр. Да цяперашняга часу яе цалкам перапрацавалі.
