Беларусь забараніла імпарт свініны з Расіі

11.01.2011 12:46
Архив Редакция

Намеснік начальніка галоўнага ўпраўлення ветэрынарыі міністэрства сельскай гаспадаркі і харчавання Беларусі Іван Смільгінь паведаміў, што Беларусь увяла неабмежаваную па працягласці забарону на ўвоз свініны з Ленінградскай вобласці Расіі. Забарона выклікана пагрозай распаўсюджвання афрыканскай чумы свіней, зафіксаванай у гэтым рэгіёне Расіі.

Іван Смільгінь растлумачыў, што свініна з Ленінградскай вобласці ў Беларусь не пастаўлялася раней, таму забарона носіць папераджальны характар. Акрамя таго, у сувязі з неспрыяльнай сітуацыяй па афрыканскай чуме падоўжаныя раней уведзеныя абмежаванні на ўвоз свініны з іншых рэгіёнаў Расіі — Калмыкіі, Чачэнскай Рэспублікі, Адыгеі, Дагестана, Паўночнай Асетыі, Карачаева-Чаркесіі, Кабардзіна-Балкарыі, Краснадарскага краю, Стаўрапольскага краю, Растоўскай, Валгаградскай і Астраханскай абласцей, перадае БелТА.

Як перадаваў Тэлеграф, раней Беларусь увяла забарону на ўвоз прадукцыі і кормаў з Германіі. На ўвядзенне падобнай прэвентыўнай меры беларускія ўлады пайшлі, каб пазбегнуць магчымага паступлення ў краіну прадукцыі, заражанай дыяксінам.