Намесніца пастаяннага прадстаўніка Беларусі пры ААН Зоя Калантай, выступаючы на пленарным пасяджэнні Генеральнай Асамблеі, прысвечаным абмеркаванню даклада генеральнага сакратара аб працы Арганізацыі, заклікала правесці тэматычнае пасяджэнне Генасамблеі, прысвечанае абароне падрастаючага пакалення ад сацыяльнай дэградацыі.
Беларуская дыпламатка адзначыла, што крыху раней беларуская дэлегацыя ў кантэксце тэмы глабальных партнёрстваў выступіла за падтрымку таленавітай моладзі і абарону падрастаючага пакалення ад сацыяльнай дэградацыі. «Спадзяемся, што дзяржавы-члены ААН адгукнуцца на беларускую ініцыятыву і падтрымаюць правядзенне тэматычных дэбатаў Генеральнай Асамблеі на гэтую тэму», — заявіла Зоя Калантай, перадае Цэнтр навін ААН.
Акрамя таго, прадстаўніца Беларусі заклікала хутчэй завяршыць распрацоўку ўсеабдымнай Канвенцыі аб тэрарызме. Паводле яе слоў, акрамя гэтай сусветнай супольнасці трэба будзе карпатлівая сумесная праца па забеспячэнні поўнага і эфектыўнага выканання глабальнага плана дзеянняў па барацьбе з гандлем людзьмі, прынятага на 64-й сесіі Генасамблеі ААН.
Зоя Калантай таксама адзначыла важнасць актывізацыі намаганняў па абмене сучаснымі энергатэхналогіямі. Паводле яе слоў, Беларусь гатова ўнесці свой уклад у гэтую дзейнасць. У якасці прыкладу дыпламат прывяла стварэнне ў краіне міжнароднай лабараторыі па аднаўляльных крыніцах энергіі на базе Інстытуту энергетыкі НАН.
Прадстаўніца Беларусі адзначыла поспех Агляднай канферэнцыі па Дамове аб нераспаўсюджванні ядзернай зброі (ДНЯЗ), якая прайшла ў траўні 2010 года, падкрэсліўшы, што прадстаўленне няядзерным дзяржавам-удзельніцам ДНЯЗ «дакладных і безумоўных гарантый бяспекі на аснове юрыдычна абавязковага дакументу істотна ўмацуе рэжым нераспаўсюджвання». Акрамя таго, Зоя Калантай прыцягнула ўвагу да будучага 25-годдзя аварыі на Чарнобыльскай АЭС. Паводле яе слоў, пераадоленне наступстваў аварыі адпавядае інтарэсам усёй міжнароднай супольнасці. У сувязі з гэтым яна заклікала падтрымаць праект рэзалюцыі Генеральнай Асамблеі па Чарнобылі.
