З 30 чэрвеня 2010 года грамадзяне краін СНД атрымаюць магчымасць адпраўляць заяўку на візу ў Латвію па інтэрнэце. Аб гэтым праінфармаваў супрацоўнік Упраўлення па справах грамадзянства і міграцыі Латвіі Андрэй Рабцаў. Кошт увядзення гэтай паслугі склаў для Латвіі 30 тыс. латаў (173,78 млн. рублёў, або 57,65 тыс. даляраў).
У фінансаванні праекту ўдзельнічаў Еўрапейскі фонд рэгіянальнага развіцця (ERAF), паведамляе ІА «REGNUM-Беларусь» са спасылкай на агенцтва LЕТА.
З’яўляючыся членам ЕС, Латвія не можа самастойна скасаваць візы для грамадзян СНД, хаця большасць членаў латвійскага ўрада выступаюць за бязвізавы рэжым з Расіяй. Аднак краіна прадпрымае некаторыя крокі па палягчэнні ўмоваў для тых, хто звяртаецца па латвійскую візу. Так, яны могуць афармляць візы па пошце з дапамогай службы Pony Express.
Таксама мяркуецца, што грамадзянам РФ, якія пражываюць у рэгіёнах, для падачы дакументаў на візы не спатрэбіцца ехаць у Маскву ці Санкт-Пецярбург. Затым будзе заснавана электронная сістэма віз, а з красавіка 2011 года будзе прадстаўляцца магчымасць абскардзіць адмову ў візе.
Па некаторых ацэнках, паток рускамоўных турыстаў з СНД у Латвію летам 2011 года можа павялічыцца да 30%.
Акрамя Беларусі, у Садружнасць незалежных дзяржаў уваходзяць Азербайджан, Арменія, Грузія, Казахстан, Кыргызстан, Малдова, Расія, Таджыкістан, Узбекістан і Украіна.
Як раней перадаваў Тэлеграф, Латвія адмяніла консульскі збор за афармленне нацыянальнай доўгатэрміновай візы для беларускіх грамадзян з 24 студзеня. Такая віза афармляецца для ўезду ў Латвію з мэтай атрымання віду на жыхарства, для працы, навучання, уз’яднання з сям’ёй і г.д. Разам з тым механізм выдачы і кошт шэнгенскай візы, аднаразовай і шматразовай, засталіся ранейшымі, консульскі збор пры іх афармленні складае 60 еўра.
