Начальнік аддзела інфармацыйных тэхналогій Беларускай дзяржаўнай інспекцыі па электрасувязі (БелДІЭ) Андрэй Сіліч паведаміў аб тым, што па стане на восьмага чэрвеня на разглядзе знаходзіцца каля 60 заявак на рэгістрацыю інтэрнэт-рэсурсаў. "На сённяшні дзень на разглядзе знаходзіцца каля 60 заявак, з іх зарэгістравана не больш за 20 рэсурсаў", — сказаў прадстаўнік БелДІЭ.
Андрэй Сіліч нагадаў, што ў адпаведнасці з пастановай Саўміна Беларусі і указам № 60 Аляксандра Лукашэнкі незарэгістраваныя інтэрнэт-рэсурсы не могуць быць выкарыстаны. Разам з гэтым, прадстаўнік БелДІЭ нагадаў, што працэс рэгістрацыі сайтаў павінен быць завершаны да першага ліпеня, паведамляе БелТА.
Па словах Андрэя Сіліча, асноўная маса заявак на рэгістрацыю сайтаў адхіляецца праз вялікую колькасць памылак, у тым ліку і арфаграфічных. Андрэй Сіліч адзначыў таксама, што па стане на 26 траўня не было зарэгістравана наогул ні аднаго рэсурсу байнэту.
Як ужо паведамляў Тэлеграф, згодна з указам аб інтэрнэце, усе правайдэры да першага ліпеня павінны перанесці сваіх карыстальнікаў у беларускія дата-цэнтры і зарэгістраваць іх у БелДІЭ. Таксама рэгістрацыі падлягалі ўсе электронныя паштовыя скрыні (каля двух мільёнаў). Аднак, Мінсувязі і адпаведныя органы дзяржкіравання прынялі рашэнне адмяніць рэгістрацыю электроннай пошты.
У сваю чаргу, як кажуць эксперты, прайсці дзяржаўную рэгістрацыю давядзецца 50 тыс. сайтаў. Зарэгістраваць іх усе да першага ліпеня не ўяўляецца магчымым, лічаць спецыялісты.
«На мінулым тыдні казалі, што не зарэгістравана ні аднаго сайта. На працягу чэрвеня каля 30 тыс. сайтаў будзе пададзена на рэгістрацыю. Калі БелДІЭ будзе хаця б праглядаць гэтыя заявы, то відавочна, што месяца дакладна не хопіць», — заяўлялі эксперты.
