Валавы ўнутраны прадукт Беларусі ў студзені-верасні гэтага года павялічыўся на 6,6% да ўзроўню аналагічнага перыяду 2009 года і склаў 116,641 трлн. рублёў. Пра гэта паведамілі ў Нацыянальным статыстычным камітэце Беларусі.
Па дадзеных Белстата, прамысловай прадукцыі па выніках дзевяці месяцаў выпушчана на 114,670 трлн. рублёў, што на 10,3% больш у параўнанні са студзенем-вераснем 2009 года, перадае АФН.
Аб’ём сельгасвытворчасці вырас на 1,1% да 25,518 трлн. рублёў, інвестыцыі ў асноўны капітал павялічыліся на 9,5% і склалі 36,056 трлн. рублёў. Раздробны таваразварот вырас на 16,2% да 49,406 трлн. рублёў.
У адпаведнасці з зацверджаным ўладамі прагнозам сацыяльна-эканамічнага развіцця рост ВУП у 2010 годзе павінен скласці 11-13%, прамысловай вытворчасці — 10-12%.
Белстат: інфляцыя з пачатку года склала 6,8%
У Беларусі спажывецкія кошты ў верасні 2010 года выраслі на 1,6% пасля росту на 0,6% у жніўні і на 0,3% у ліпені, паведамляе Нацыянальны статыстычны камітэт. З пачатку года інфляцыя ў краіне склала 6,8%, а ў гадавым вылічэнні (да верасня мінулага года) — 9%.
Цэны вытворцаў прамысловай прадукцыі ў верасні павялічыліся на 3,4%, у студзені-верасні — на 15,3%.
Прагноз на 2010 год прадугледжвае абмежаванне росту спажывецкіх коштаў у межах 8-10%.
