Кіраўнік Саюза пісьменнікаў Беларусі і старшыня Грамадскага савета па маральнасці, генерал Мікалай Чаргінец уключаны ў спіс службоўцаў, якім забаронены ўезд у Еўрасаюз. У якасці адказу на візавыя абмежаванні Чаргінец папросіць міжнароднае таварыства перагледзець пытанне генацыду беларускага народа падчас Другой Сусветнай вайны з боку Германіі.
«Калі гэта (уключэнне прозвішча генерала ў спіс — Тэлеграф) пацвердзіцца, я буду ініцыяваць, выкарыстоўваючы ўсе свае магчымасці ў многіх краінах, разгляду германскага генацыду ў дачыненні да беларускага народа», — цытуе Мікалая Чаргінца «Еўрапейскае радыё для Беларусі».
Чаргінец: абыдземся без Еўропы
Старшыня Саюза пісьменнікаў часта ездзіць на адпачынак па Беларусі, у Сочы, Турцыю і на Балканы, аднак не ў Нямеччыну або Польшчу. «Я аб’ездзіў увесь свет. Ну, не паеду ў Еўропу, паеду ў Браслаў, там месца выдатнейшае, чым у Германіі. Еўропу я глядзеў. Добрыя, дагледжаныя гарады, як правіла, занадта дарагія для нас. Карацей, абыдземся», — заявіў ён.
Як ужо перадаваў Тэлеграф, Мікалай Чаргінец, у прыватнасці, заяўляў, што былы кандыдат у прэзідэнты Уладзімір Някляеў, збіты 19 снежня да пачатку масавых пратэстаў, «парушыў закон Беларусі і вінаваты ў арганізацыі масавых дэманстрацый».
Мікалая Чаргінца, які таксама з’яўляецца старшынём камісіі па міжнародных справах Савета Рэспублікі, ЕС не толькі ўключыў у спіс неўяздных, але і замарозіў яго актывы.