Лёгкаатлетку Таццяну Супрун дыскваліфікавалі на два гады за ўжыванне забароненых рэчываў. Пра гэта аб'явіла Нацыянальнае антыдопінгавае агенцтва Беларусі. У траўні 2010 года на Кубку Беларусі ў Берасці 24-гадовая бягунка з Мінску, ледзь аднавіўшыся пасля траўмы, упэўнена выйграла дыстанцыю 800 метраў, з вынікам 2 хвіліны 0,64 секунды апярэдзіўшы бліжэйшую суперніцу амаль на 8 секунд.
Аднак допінг-пробы, узятыя ў спартсменкі пасля фінішу, аказаліся станоўчымі, перадае БелТА.
Як інфармуе афіцыйны сайт Нацыянальнага антыдопінгавага агенцтва, з сакавіка па ліпень 2010 праведзена 474 допінг-пробы. З іх спаборніцкіх было 149, пазаспаборніцтвамі 325. Праверана 77 спартоўцаў ва ўзросце да 18 гадоў. Адзіным выяўленым за дадзены перыяд парушэннем антыдопінгавых правілаў з’яўляецца станоўчы допінг-тэст Таццяны Супрун.
З 29 ліпеня па 10 жніўня супрацоўнікі Нацыянальнага антыдопінгавага агенцтва правялі пазаспаборніцкі допінг-кантроль спартоўцаў, якія адправіліся на I летнія юнацкія Алімпійскія гульні ў Сінгапур. Было даследавана 50 допінг-пробаў, аналізы якіх прынеслі адмоўныя вынікі.
