Тэледэбаты кандыдатаў у прэзідэнты Беларусі будуць паказаны не ў прамым эфіры, а ў запісе, паведаміла 14 кастрычніка старшыня Цэнтрвыбаркама Лідзія Ярмошына. "Гэта стане для многіх кандыдатаў страхоўкай, паколькі не ўсе з іх з'яўляюцца дасведчанымі медыйнымі змагарамі, і запіс дазволіць прадставіць іх у больш прывабным святле ў вачах выбаршчыкаў", — дадала кіраўніца ЦВК.
Лідзія Ярмошына мяркуе, што тэледэбаты, магчымасць правядзення якіх будзе прадстаўлена кандыдатам упершыню, дазволяць выбаршчыкам даведацца пра пазіцыю прэтэндэнтаў на пасаду прэзідэнта, іх стаўленне да актуальных пытаннях унутранай і знешняй палітыкі. «Ці будзе гэта ў запісе ці ў прамым эфіры — не мае значэння, таму што выбаршчык атрымае ўсю паўнату інфармацыі», — падкрэсліла старшыня ЦВК.
Лідзія Ярмошына патлумачыла, што ўдзел у тэледэбатах — добраахвотная справа кожнага кандыдата. Але калі палітык адмовіцца ад гэтай магчымасці, то «нявыкарыстаныя» паўгадзіны эфірнага часу, які адпушчаны на тэледэбаты, яму не пакрыюць. Апанентаў па тэледэбатах кожны з кандыдатаў можа выбіраць самастойна, а чарговасць выступленняў будзе вызначана па выніках лёсавання, перадае БелТА.
Кандыдаты атрымаюць па 60 хвілін бясплатнага эфіру ў прайм-тайм
Кандыдаты на пасаду прэзідэнта Беларусі атрымаюць права на два 30-хвілінныя выступы ў тэлеэфіры (з 19:00 да 20:00) і два 30-хвілінныя — на радыё (з 06:10 да 06:40), паведаміла прадстаўніца ЦВК Надзея Кісялёва.
Прэтэндэнты на прэзідэнцкі пост змогуць бясплатна выступіць у некалькіх дзяржаўных сродках масавай інфармацыі, сярод якіх Першы канал Беларускага радыё, Першы нацыянальны канал, цэнтральныя газеты «Народная газета», «Рэспубліка», «Звязда», «СБ», а таксама абласныя газеты.
Па словах кіраўніцы ЦВК Лідзіі Ярмошынай, калі раней кандыдаты ў прэзідэнты атрымлівалі бясплатны тэлеэфір з 18:00 да 19:00, а радыёэфір — з 08:00 да 09:00, то цяпер ім будзе выдзелены больш зручны час.
ЦВК дазволіў кандыдатам памыліцца ў разліку сваіх даходаў на 20%
Згодна з рашэннем ЦВК, прэтэндэнты на пасаду прэзідэнта Беларусі пры падліку сукупнага гадавога даходу (свайго і блізкіх сваякоў) могуць памыліцца не больш чым на 20%. Дадзеныя, названыя ў дэкларацыі аб даходах кандыдатаў, Цэнтрвыбаркам будзе правяраць на дакладнасць, звяртаючыся ў МУС, міністэрства па падатках і зборах і іншыя дзяржаўныя органы.
Пры гэтым недахопам будзе прызнавацца адсутнасць у дакуменце звестак аб валоданні нерухомай маёмасцю (дом, кватэра і г.д.) або долі ў такой маёмасці, аб валоданні транспартнымі сродкамі і каштоўнымі паперамі, паведамілі ў ЦВК.
Істотнага характару не будзе мець адсутнасць або наяўнасць звестак аб валоданні чэкамі «Маёмасць». Акрамя таго, не будзе лічыцца сур’ёзнай памылкай адсутнасць звестак аб транспартным сродку, які быў скрадзены.
