У суседніх з Беларуссю краінах банкі працягваюць дэвальваваць беларускі рубель. Так, калі, у некаторых банках Латвіі дэвальвацыя рубля дайшла да 50%, то ў Літве дэвальвацыя ў пачатку тыдня дасягнула 18%. Пры гэтым сітуацыя з наяўнымі беларускімі рублямі ў суседніх краінах па-ранейшаму застаецца напружанай. Да прыкладу, у Вільні аперацыі з наяўнымі беларускімі рублямі праводзяць толькі ў адным банку.
Як паведамляе карэспандэнт Тэлеграфа, у літоўскай сталіцы ў банку «Citadele banka» абмяняць наяўныя беларускія рублі можна па курсе 3,6 тыс. рублёў за даляр або 5,19 тыс. рублёў за еўра. У адносінах да курсу Нацыянальнага банка Беларусі дэвальвацыя склала 18%. Між тым яшчэ ў панядзелак, 4 красавіка, дэвальвацыя беларускага рубля складала 21%. Даляр можна было купіць за 3,7 тыс. рублёў. Курс літа ў адносінах да беларускага рубля за два дні падняўся на 1,3%.
Пры гэтым у літоўскіх банках вызначана абмежаванне на абменныя аперацыі з наяўнай валютай. Так, за адзін раз грамадзяне могуць абмяняць не больш за тысячу даляраў ці еўра.
Між тым, латвійскі «Rietumu Banka» 7 красавіка знізіў кошт продажу беларускага рубля. Калі ўчора за даляр прасілі 4,1 тыс. рублёў, сёння цану знізілі на 100 рублёў. Кошт куплі не змяніўся — 4,6 тыс. рублёў. Адпаведна, у дачыненні да афіцыйнага курсу Нацбанка Беларуси курс рубля ў Латвіі дэвальваваўся на 50%.
У адносінах да расійскага рубля курс нацыянальнай валюты Беларусі таксама змяніўся. Калі 6 красавіка афіцыйны курс Цэнтрабанка Расіі склаў 92,9 беларускіх рублёў, то 7 красавіка ён знізіўся да 92,4 беларускіх рублёў.
Як раней перадаваў Тэлеграф, беларускія ўлады катэгарычна адмаўляюцца праводзіць дэвальвацыю нацыянальнай валюты, нягледзячы на тое, што міжнародныя фінансавыя эксперты лічаць гэта неабходнай умовай аднаўлення эканамічнай сістэмы краіны. Так, эксперты міжнароднага рэйтынгавага агенцтва Moody’s перакананыя, што ў Беларусі праз праблемы з дэвальвацыяй могуць паўтарыцца падзеі, аналагічныя расійскаму фінансаваму крызісу 2008-2009 гадоў. Між тым замежныя банкі актыўна дэвальвуюць нацыянальную валюту Беларусі.
