Дзяржаўны мытны камітэт Беларусі абвінаваціў Расію ў невыкананні ўзятых на сябе абавязкаў па пастаўках бязмытнай нафты. Пра гэта гаворыцца ў заяве беларускага мытнага ведамства, апублікаванай чацвёртага сакавіка па выніках перамоў з прадстаўнікамі Федэральнай мытнай службы Расіі.
«У адпаведнасці з дамовай па пытаннях узаемавыгадных умоў перапрацоўкі расійскай нафты ў Беларусі, Дзяржаўным мытным камітэтам Беларусі праведзены перамовы з Федэральнай мытнай службай Расіі і прапанаваны пэўныя варыянты па спрашчэнні працэдур перасоўвання нафты і нафтапрадуктаў», — гаворыцца ў заяве ДМК.
Як распавялі ў мытным камітэце, ФМС РФ, «спасылаючыся на адсутнасць прамых указанняў і на тое, што адказнымі за рэалізацыю дамовы паміж урадамі Расіі і Беларусі аб мерах па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў прызначаны мінэнерга і мінэканамразвіцця, ухілілася ад правядзення перамоў па гэтым пытанні».
«Дзяржаўны мытны камітэт Беларусі сітуацыю, якая склалася адносна паставак нафты ў Беларусь для перапрацоўкі без збірання мытнай пошліны, лічыць невыкананнем узятых на сябе абавязкаў расійскім бокам, прадугледжаных дамовай», — заявілі ў ДМК Беларусі.