У ААТ "Укртранснафта" паведамілі, што 13 лютага 2011 года кампанія пачала перапампоўку азербайджанскай нафты на беларускі нафтаперапрацоўчы завод у Мазыры. Такім чынам, "Укртранснафта" пачала практычную рэалізацыю міжурадавых дамоўленасцяў з Беларуссю па рэгулярных пастаўках каспійскай нафты па нафтаправодзе Адэса-Броды ў аверсным рэжыме.
У афіцыйным паведамленні кампаніі гаворыцца, што другі танкер з лёгкай нафтай гатунку Azeri Light аб’ёмам 85 тыс. тон быў прыняты ў порце «Паўднёвы» 11 лютага. Разгрузку танкера Seaoath завяршылі 12 лютага, а 13 лютага пачалі перапампоўку нафты ў Беларусь.
Акрамя таго, у кампаніі «Укртранснафта» таксама паведамілі, што наступны танкер з азербайджанскай нафтай для Беларусі чакаецца 14 лютага.
Як раней перадаваў Тэлеграф, першы танкер з азербайджанскай нафтай прыбыў ва Украіну 29 студзеня. Тады ва ўкраінскі порт «Паўднёвы» танкер Minerva Astra даставіў 81 тыс. тон азербайджанскай нафты для Беларусі.
Пастаўкі азербайджанскай нафты ў Беларусь ажыццяўляюцца на падставе дамоўленасцяў паміж ЗАТ «Беларуская нафтавая кампанія» і Дзяржаўнай нафтавай кампаніяй Азербайджана (SOCAR) і Венесуэлай. У рамках кантракту, па своп-схеме ў 2011 годзе ў Беларусь будзе дастаўлена чатыры мільёны тон нафты (азербайджанская нафта будзе замяшчаць венесуэльскую).
