Украінскі жаночы рух Femen 11 траўня правёў у Кіеве на майдане Незалежнасці акцыю ў падтрымку ахвяраў "крывавай нядзелі" ў Беларусі. "Актывісткі Femen расстралялі са сваіх даўганогіх рагатак апошняга тырана Еўропы, заклікаючы міжнародную грамадскасць даць жорсткую ацэнку дзеянням маньяка Лукашэнкі і выратаваць беларускі народ шляхам сілавога звяржэння нелігітымнага беларускага самадзержца", — гаворыцца на старонцы руху Femen ў LiveJournal.
«Нягледзячы на каласальную сілу волі, беларускія актывісты не ў стане супрацьстаяць мяснікам з мясцовага КДБ. Шантаж, катаванні і турма — вось метады апрычнікаў Лукашэнкі. Лукашэнка — гэта не праблема Беларусі, гэта праблема ўсяго дэмакратычнага свету», — заявіла лідарка жаночага руху Femen Ганна Гуцол.
Сваю акцыю ўкраінскія актывісткі звязалі з тым, што 11 траўня ў Беларусі «адбудзецца кульмінацыя» судовых распраў над удзельнікамі мірных пратэстаў, якія адбываліся ў Мінску 19 снежня 2010 года».