Камітэт дзяржаўнага кантролю Беларусі падрыхтаваў каардынацыйны план кантрольнай дзейнасці на другое паўгоддзе гэтага года. "Патрабаванне кіраўніка дзяржавы па скарачэнні колькасці праверак выконваецца: у праект плана на другое паўгоддзе іх уключана на сем тысяч менш, чым у плане на студзень-чэрвень", — расказала начальніца аддзела каардынацыі дзейнасці кантралюючых органаў КДК Данута Рыжыкава.
З каардынацыйным планам ўсе жадаючыя змогуць азнаёміцца з 15 чэрвеня, калі спісы будуць апублікаваны на афіцыйным сайце ведамства, паведамляе «Рэспубліка». Данута Рыжыкава распавяла таксама, што дзяржорганы прарабілі вялікую працу па прывядзенні заканадаўства ў адпаведнасць з нормамі ўказа прэзідэнта № 510, і дадала, што ўсяго было прынята каля 40 нарматыўна-прававых актаў рознага ўзроўню.
Па словах прадстаўніка Камітэта дзяржкантролю, пасля заўваг КДК з плану выключылі больш за чатыры тысячы праверак: калі розныя кантралюючыя органы складалі свае прапановы, то некаторыя суб’екты гаспадарання неабгрунтавана патрапілі ў іх спісы. «Аднак, сур’ёзных парушэнняў у падрыхтоўчай працы ведамстваў выяўлена не было», — адзначыла Данута Рыжыкава.
Асноўную прычыну недахопаў спецыялістка бачыць у недасканаласці аўтаматызацыі кантрольнага працэсу. «Міністэрства па падатках і зборах толькі па горадзе Мінску ўнесла больш за 1,3 тыс. прапаноў аб правядзенні праверак. І ўсе яны апынуліся абгрунтаванымі: рэч у тым, што ў падатковых органаў ёсць адзіная электронная база падаткаплацельшчыкаў, і яны могуць якасна адсочваць прадпрыемствы, якія знаходзяцца ў групе рызыкі. Але не ўсё ведамствы маюць права доступу да сістэмы МПЗ, таму і здараюцца пры падрыхтоўцы планаў некаторыя недахопы», — патлумачыла Данута Рыжыкава.
Прадстаўніца КДК паведаміла, што цяпер вядзецца распрацоўка комплекснай базы кантрольнай і нагляднай дзейнасці, у якой будуць фіксавацца групы рызыкі суб’ектаў гаспадарання па розных параметрах. Па словах Дануты Рыжыкавай, гэта будзе чарговым крокам наперад: кампаніі атрымліваюць магчымасць сачыць за сваёй «рызыковы статыстыкай» і своечасова прымаць меры, каб перайсці ў бяспечную катэгорыю — тады шанец трапіць у план праверак значна памяншаецца.
