Канцэпцыя развіцця беларускага Дзяржпагранкамітэта прадугледжвае поўны пераход на кантрактную сістэму да 2017 года. Нягледзячы на гэта, на мяжы ўсё ж могуць працягваць працаваць салдаты тэрміновай службы, заявіў старшыня Дзяржпагранкамітэта Ігар Рачкоўскі. "Мы яшчэ раз усё ўзважылі і схіляемся да таго, што нейкую частку тэрміновай службы пакінем", — сказаў ён.
Пра прычыны такога рашэння ён паведаміў падчас онлайн-канферэнцыі, якая 7 красавіка праходзіла на сайце Белтэлерадыёкампаніі.
«Па-першае, гэта тыя людзі, з якіх будуць падбірацца прафесіяналы-кантрактнікі, як мы робім і цяпер. Другі момант — ёсць вельмі добры стымул для салдат тэрміновай службы. Тыя, хто скончыў сярэднюю навучальную ўстанову з ацэнкай не ніжэйшай за шэсць балаў па прадметах, якія патрабуюцца для паступлення ў пагранічны інстытут, ідуць па асобным конкурсе (у нас ёсць квота 30% для тых, хто адслужыў тэрміновую службу). Вядома, мы памяншаем колькасць тэрмінавікаў і імкнемся максімальна адвесці іх ад неўласцівых ім функцый — яны павінны абараняць Радзіму, і з іх павінны фарміравацца шэрагі ўжо прафесійных памежнікаў, якія захочуць працягнуць службу», — растлумачыў Ігар Рачкоўскі.
Паводле яго слоў, Дзяржпагранкамітэт налічвае 14,5 тыс. супрацоўнікаў, з якіх 20% — вайскоўцы тэрміновай службы.
Рачкоўскі: дзяўчаты-памежнікі не павінны хадзіць у шапках-вушанках
Кіраўнік ведамства распавёў і пра тое, якім чынам будзе ўдасканальвацца форма і экіпіроўка работнікаў пагранслужбы.
«Мы рыхтуем свае прапановы па паляпшэнні і змене формы адзення. Яна павінна быць і зручная, і адпавядаць статусу першай афіцыйнай асобы, якую вы сустракаеце пры перасячэнні мяжы. У мінулым годзе ўвялі прыгожыя капялюшыкі для нашых дзяўчат-пагранічнікаў. Здавалася б, невялікі атрыбут, а вонкавы выгляд ужо цалкам змяніўся. Не шапкі-вушанкі, а прыгожая шапачка. Гэта ўжо можна бачыць, перасякаючы мяжу. І, вядома, мы плануем кардынальна змяніць падыход да формы адзення. Гэта будзе тычыцца і якасці, і матэрыялу», — адзначыў ён.
Паводле яго слоў, «усё будзе беларускае». «У нас ёсць свае мадэльеры, таму будзе цалкам нядрэнна», — дадаў Ігар Рачкоўскі.
Рачкоўскі: выходзьце замуж за памежнікаў
Дзяўчаткам, якія збіраюцца стварыць сям’ю, кіраўнік Дзяржпагранкамітэта раіць выбіраць жонка з супрацоўнікаў пагранслужбы. «Выходзьце замуж за пагранічніка! Гэта надзейныя, гаспадарчыя людзі, асабліва якія прайшлі службу на памежнай заставе, дзе часта ёсць дапаможная гаспадарка з градкамі, каровамі», — сказаў ён.
Паводле яго слоў, «патрулюючы, памежнікі збіраюць грыбы і ягады пра запас, цяпер — час бярозавага соку».
«Многія мае сябры просяць накіраваць іх дзяцей, у якіх ёсць пэўныя праблемы, на мяжу, каб паслужылі на заставе. Пасля вяртання абсалютна ўсе змяняюцца, таму што там няма калі займацца лухтой. У дзень салдат-памежнік праходзіць пешшу 30 кіламетраў. Пасля гэтага толькі два жаданні — паесці і паспаць. Ды і пачуццё адказнасці пераважае над астатнімі. Памежнікі — гэта сям’я. Заўсёды існавала, існуе і будзе існаваць паняцце баявога братэрства. Таму выходзьце замуж за памежніка! Тым больш, цяперашні памежнік, сканчаючы інстытут, у дасканаласці валодае замежнымі мовамі», — дадаў Ігар Рачкоўскі.
