Дэпутаты Еўрапарламенту 10 сакавіка прынялі рэзалюцыю, у якой заклікалі беларускія ўлады неадкладна расследаваць паведамленні аб прымяненні катаванняў да зняволеных. Катаванні з'яўляюцца бесчалавечным абыходжаннем, яны катэгарычна забароненыя нормамі міжнароднага права і абсалютна недапушчальныя ў еўрапейскай краіне, адзначылі еўрапарламентарыі.
Таксама ў рэзалюцыі гаворыцца аб недапушчальнасці запалохвання і прыгнёту апазіцыянераў і незалежных СМІ, стварэння ў Беларусі «атмасферы страху», паведамляе Deutsche Welle са спасылкай на KNA.
Таксама еўрадэпутаты запатрабавалі безумоўнага і неадкладнага вызвалення ўсіх затрыманых апазіцыянераў. Еўрапарламент заявіў, што, калі Беларусь не зробіць належных высноваў аб неабходнасці захавання правоў чалавека, то пад пагрозай апынецца яе збліжэнне з Еўрасаюзам і ўдзел у праграме «Усходняе партнёрства».
Еўрапарламентарыі, акрамя таго, заклікалі камітэт міністраў ЕС, Еўракамісію і вярхоўнага прадстаўніка ЕС па замежных справах і палітыцы бяспекі Кэтрын Эштан разгледзець пытанне аб пашырэнні санкцый на пракурораў і суддзяў, якія ўдзельнічаюць у працэсах над беларускай апазіцыяй.
Як раней паведамляў Тэлеграф, былы кандыдат у прэзідэнты Беларусі Алесь Міхалевіч заявіў, што ў следчым ізалятары КДБ у Мінску, адкуль ён быў нядаўна вызвалены, актыўна прымяняюцца катаванні. Разам з тым у КДБ адзначылі, што дадзеныя заявы не адпавядаюць рэчаіснасці і з’яўляюцца паклёпніцкімі.
