Галоўны трэнер барысаўскага БАТЭ Віктар Ганчарэнка заявіў на прэс-канферэнцыі пасля нічыйнага матчу ў Кіеве з мясцовым "Дынама", што барысаўцы ставяць перад сабой задачу выйсці ў наступны раунд Лігі Еўропы. "Для сябе мы паставілі такую задачу. Ды і ў нас ёсць рэсурсы для гэтага", — упэўнены настаўнік лідара беларускага чэмпіянату.
«На мой погляд, для нас будуць самымі цяжкімі матчы з «Шэрыфам». Першапачаткова мы былі ў кошыку ніжэй, чым «Дынама» і АЗ, таму вырашальнымі матчамі ў нас будуць паядынкі з «Шэрыфам» за выхад з групы», — адзначыў Віктар Ганчарэнка.
Пры гэтым трэнер падзякаваў сваім падапечным за паказаную ў Кіеве гульню, а адказваючы на пытанне аб тым, хто быў найлепшым гульцом на полі, сказаў: «Як заўсёды, найлепшай была каманда».
Ганчарэнка: БАТЭ заўсёды гуляе на перамогу
Настаўнік барысаўцаў таксама пракаментаваў сваё рашэнне выпусціць у другім тайме другога нападніка і заявіў, што БАТЭ хацеў выйграць матч. «Я ўжо казаў, што па-іншаму мы проста не прывыклі і не ўмеем гуляць. Мы заўсёды граем на перамогу, і такая псіхалогія дапамагае нам», — распавёў Віктар Ганчарэнка.
«Мы імкнуліся ісці наперад, песцілі надзею, што ўсё-ткі атрымаецца перамагчы. Не атрымалася, тым не менш лічу, што быў вельмі добры матч у выкананні абедзвюх каманд і, напэўна, вынік заканамерны», — падсумаваў трэнер БАТЭ.