Афіцыйны прадстаўнік "Газпрома" Сяргей Купрыянаў пракаментаваў патрабаванне прэзідэнта Беларусі даплаціць 32 млн. даляраў у кошт пагашэння доўгу за транзіт газу. Па словах прэс-сакратара расійскага газавага холдынгу, па дзеючым кантракце "Газпром" Беларусі нічога не павінен, а дадатак да яго будзе падпісана ў найбліжэйшы час.
«Па ўмовах кантракту, які дзейнічае на пастаўку і транзіт газу ад 31 снежня 2006 года «Газпром» Беларусі нічога не павінен. А па дадатку да кантракту на 2010 год мы з беларускімі калегамі ўжо прынцыпова дамовіліся і разлічваем падпісаць яго ў найбліжэйшы час», — прыводзіць словы Сяргея Купрыянава РИА «Новости».
Як раней паведамляў Тэлеграф, у «Газпроме» сцвярджаюць, што па дзеючым кантракце Беларусь можа павысіць стаўку транзіту да 1,88 даляра за прапампоўку тысячы кубаметраў газу на сто кіламетраў толькі пры ўмове адначасовага павышэння аптовых коштаў на «блакітнае паліва» для беларускіх спажыўцоў.
«Газпром» да цяперашняга моманту пагасіў доўг за транзіт газу перад Беларуссю ў памеры 228 млн. даляраў, аднак Мінск лічыць, што Расія павінна выплаціць 260 млн. даляраў (з разліку тарыфу на прапампоўку ў памеры 1,88 даляра). Прэзідэнт Беларусі Аляксандр Лукашэнка 25 чэрвеня даў «Газпрому» двое сутак на пагашэнне рэшты запазычанасці і паабяцаў у адваротным выпадку цалкам перакрыць транзіт расійскага газу і нафты ў Еўропу. У «Газпроме» наяўнасць рэшты доўгу не прызнаюць.
