Выступ у эфіры беларускага тэлебачання прэзідэнта Грузіі Міхаіла Саакашвілі не палепшыць адносіны Беларусі і Расіі. Пра гэта заявіў кіраўнік вышэйшага савета партыі "Адзіная Расія", спікер Дзяржаўнай Думы РФ Барыс Грызлоў.
«Для нас, для Расіі спадар Саакашвілі — ізгой, ніякіх стасункаў з ім няма і быць не можа. Любое паляпшэнне адносін з Грузіяй можа быць толькі ў тым выпадку, калі прэзідэнтам у гэтай краіне будзе іншы чалавек», — заявіў спікер Дзярждумы РФ, паведамляе ИТАР-ТАСС.
«Тыя, хто дае магчымасць Саакашвілі адчуваць сябе прэзыдэнтам, у тым ліку ў іншай краіне, прымаюць рашэнні, якія не могуць паўплываць на паляпшэнне адносінаў з Расіяй», — падкрэсліў Барыс Грызлоў.
Як раней паведамляў Тэлеграф, Першы тэлеканал беларускага тэлебачання ў чацвер, 15 ліпеня, пакажа эксклюзіўнае інтэрв’ю з прэзідэнтам Грузіі Міхаілам Саакашвілі. Як анансавала Белтэлерадыёкампанія, грузінскі лідар раскажа, ці можна памірыць Тбілісі і Маскву, калі Грузія ўступіць у Еўрасаюз, у якой ежы ён адмаўляе сабе і на што крыўдуюць ягоныя сваякі.
