Лідар Партыі БНФ Аляксей Янукевіч, выступаючы перад удзельнікамі мітынгу, прысвечанаму Дню Волi, заявіў, што "цяперашні рэжым шануе выключна суверэнітэт сваёй улады". "Ён цураецца ўсяго, што мае сапраўдныя беларускія карані», — адзначыў палітык, абвясціўшы пра правядзенне месячніка беларускай салідарнасці.
Паводле меркавання сустаршыні аргкамітэта па стварэнні партыі «Беларуская хрысціянская дэмакратыя» Віталя Рымашэўскага, у краіне падымаецца новая хваля адраджэння. «З’явілася шмат новых рухаў, арганізацый і партый дэмакратычнай скіраванасці», — падкрэсліў актывіст, пажадаўшы таксама ўдзельнікам веры ў перамогу, паведамляе БелаПАН.
Прадстаўнік Руху «За Свабоду» Алесь Лагвінец заявіў, што незалежнасць і свабода — «гэта не толькі гутаркі, танныя газ і нафта». «У першую чаргу гэта незалежныя інстытуты ўлады, вольная эканоміка, празрыстыя дэмакратычныя выбары», — заявіў палітык.
Алесь Лагвінец таксама заклікаў аддаць даніну павагі дзеячам БНР, «вядомым і невядомым героям, якія захавалі нацыянальнае адзінства».
«Для беларусаў як для нацыі галоўнае — самім распараджацца сваім лёсам, каб дзяржава была незалежнай», — сказаў грамадскі дзеяч Вячаслаў Сіўчык.
