Кіраўнік юрыдычнай камісіі Беларускага Хельсінкскага камітэту Гары Паганяйла лічыць, што ад прэзідэнта Беларусі Аляксандра Лукашэнкі можна чакаць усяго. "Гэта рэальная пагроза. Лукашэнка баіцца любога публічнага выказвання незадаволенасці людзьмі, таму ад гэтага чалавека можна чакаць усяго. Да таго ж трэба ўлічваць, што мы маем справу з хворым чалавекам", — сказаў ён.
Юрыст нагадаў, што прэзідэнт сам заяўляў, што гатовы ўжыць войскі, каб захаваць уладу. Пры гэтым, па словах Гары Паганяйла, Канстытуцыя Беларусі гарантуе грамадзянам права на правядзенне мірных акцый і сходаў.
«Удзельнічаць у іх — неад’емнае права ўсіх, хто не згодзен з урадам. Мы нанялі гэты ўрад, каб ён кіраваў эканомікай, сацыяльнай сферай, з выгадай, перш за ўсё, для народа. Таму калі незадаволеныя людзі выходзяць на плошчу і гэты пратэст носіць мірны характар — ён не павінен разганяцца з выкарыстаннем сілы. Гэта прамое парушэнне не толькі беларускіх законаў, але і тых міжнародных абавязацельстваў, якія падпісала наша краіна», — адзначыў прадстаўнік БХК.
Як паведамляў Тэлеграф, Аляксандр Лукашэнка ў час наведвання сельгаспрадпрыемства «Азярыцкі-Агра» Смалявіцкага раёна Мінскай вобласці заявіў, што не дапусціць ніякіх страйкаў і несанкцыянаваных акцый у краіне.
«У нас «свядомыя» ў Мінску ў сацыяльных сетках, інтэрнэце заклікаюць да забастоўкі. Я так буду глядзець, назіраць, а потым як шандарахну — не паспеюць за мяжу перабегчы», — сказаў ён.
