Першы сакратар пасольства Польшчы ў Мінску Павел Марчук паведаміў пра тое, што запланаваныя на дзявятага сакавіка кансультацыі па ўрэгуляванні дзейнасці Саюза палякаў перанеслі. “Перамовы адбудуцца ў другой палове сакавіка. Пэўную дату яшчэ не прызначылі”, — сказаў Павел Марчук.
Аднак прычыны пераносу мерапрыемства першы сакратар не агучыў, сказаўшы толькі, што польскі бок гатовы да перамоў, паведамляе «Польскае радыё».
Як раней паведамляў Тэлеграф, намеснік старшыні ГА «Саюз палякаў на Беларусі» (СПБ) Алена Богдан паведамляла, што беларуска-польская камісія па праверцы дзейнасці Саюза палякаў на Беларусі пачне працу дзявятага сакавіка. «Мы жадаем, каб была дадзена аб’ектыўная адзнака дзейнасці нашага грамадскага аб’яднання, таму свядома ідзём на такі ўсебаковы аўдыт нашай статутнай і гаспадарчай дзейнасці», — адзначыла намглавы СПБ.
“Хай міжнародная камісія праверыць факты ўшчамлення правоў палякаў, якія нібы маюць месца ў Беларусі. Мы гатовыя падаць любыя дакументы для праверкі, наш саюз — адкрытая структура”, — падкрэсліла Алена Богдан.
Дамоўленасць пра стварэнне экспертнай камісіі па ўрэгуляванні дзейнасці СПБ была дасягнута паміж міністрам замежных спраў Польшчы Радаславам Сікорскім і прэзідэнтам Беларусі Аляксандрам Лукашэнкам падчас сустрэчы ў Кіеве 25 лютага.
