Кастусёў просіць Вярхоўны суд перагледзець вынікі выбараў

04.01.2011 09:20
Архив Редакция

Экс-кандыдат у прэзідэнты Беларусі ад Партыі БНФ Рыгор Кастусёў падаў заяву ў Вярхоўны суд Беларусі з просьбай перагледзець рашэнне Цэнтральнай выбарчай камісіі аб прызнанні вынікаў прэзідэнцкіх выбараў. Як паведамілі ў ПБНФ, заява ўключае ў сябе пералік парушэнняў, зафіксаваных назіральнікамі, членамі выбарчых камісій і даверанымі асобамі кандыдатаў.

«У мяне няма надзеі на справядлівае рашэнне Вярхоўнага суда. Магчыма, мая заява нават не будзе прынята да разгляду. Тым не менш, я перакананы, што падаць заяву з просьбай перагледзець рашэнне ЦВК з улікам парушэнняў, мне трэба было. А рашэнне па маёй заяве хай застанецца на сумленні беларускіх уладаў», — адзначыў Рыгор Кастусёў.

Як паведамляў Тэлеграф, Цэнтральная выбарчая камісія Беларусі 24 снежня не задаволіла патрабаванне былога кандыдата ў прэзідэнты Рыгора Кастусёва прызнаць незаконнымі прэзідэнцкія выбары па ўсёй краіне. Члены ЦВК прынялі гэтае рашэнне адзінагалосна. Па словах кіраўніцы ЦВК Лідзіі Ярмошынай, для адхілення скаргі Рыгора Кастусёва былі ўсе падставы.