Упраўленне ваеннай контрвыведкі (УВКВ) Камітэту дзяржаўнай бяспекі Беларусі выявіла факт карупцыі ў Мінскім эксплуатацыйным упраўленні Узброеных сілаў Беларусі. У дачыненні да былога начальніка аддзелу тэхнічнага нагляду арганізацыі распачалі крымінальную справу, плануецца прыцягнуць да адказнасці і ягоных змоўшчыкаў.
Былому начальніку ўпраўлення прад’явілі абвінавачванне па ч.3 арт.424 Крымінальнага кодэксу Беларусі (злоўжыванне ўладай або службовымі паўнамоцтвамі, здзейсненае службовай асобай, якая займае адказнае становішча), перадае «Ежедневник».
Па дадзеных следчага аддзелу ваеннай контрвыведкі, з красавіка 2008 года па 16 снежня 2009 года, чыноўнік злоўжываў сваімі паўнамоцтвамі. У інтарэсах грамадства з дадатковай адказнасцю «Кенігбаў», начальнік аддзелу тэхнічнага нагляду ўключыў камерцыйную структуру ў дамову на тэхнічнае абслугоўванне аб’ектаў Мінскага эксплуатацыйнага ўпраўлення УС Беларусі.
Прычым ТДА было зарэгістравана ў сакавіку 2008 года — гэта значыць, да ўключэння ў абслугоўванне УС арганізацыя існавала толькі месяц, што гаворыць пра рэгістрацыю пад карупцыйную схему.
У выніку неправамерных дзеянняў падазраваны, па папярэдніх падліках, учыніў шкоду Узброеным сілам на суму больш за 420 млн. рублёў (каля 138 тыс. даляраў).
Аднак самастойнага рашэння аб супрацоўніцтве з толькі што створанай камерцыйнай структурай чыноўнік прыняць не мог, паколькі толькі рыхтаваў дакументы. Гэта гаворыць аб магчымым прыцягненні да адказнасці іншых супрацоўнікаў Мінскага эксплуатацыйнага ўпраўлення УС.
Тым часам, на момант ўзбуджэння справы падазраваны ўжо меў больш прэстыжную працу — у Рэспубліканскім унітарным прадпрыемстве па эксплуатацыі будынка «БелЭЗ» ён атрымаў пасаду намесніка начальніка ўпраўлення па эксплуатацыі будынкаў, якія належаць Упраўленню справамі прэзідэнта.
