Кіраўніцтва Мінскага трактарнага завода абвергла інфармацыю аб тым, што сярод працоўных завода назіраюцца якія-небудзь хваляванні. "Мы самі даведаліся пра гэта ад тых, хто распаўсюджвае дадзеную інфармацыю", — заявіў 24 траўня карэспандэнту Тэлеграфа намеснік генеральнага дырэктара РУП "МТЗ" па кадрах, сацыяльным развіцці і ідэалагічнай працы Васіль Тымановіч.
«Нам няма калі думаць пра гэта. У нас працы і замоў столькі, што дай Бог іх выканаць. Прыемна, што людзі гэта разумеюць, працуюць і атрымліваюць дастойную заработную плату», — адзначыў ён.
Аб адсутнасці хваляванняў на заводзе 24 траўня паведаміў і намеснік старшыні Свабоднага прафсаюза металістаў Аляксандр Бухвостаў. «Нічога не адбываецца. Былі ўчора хваляванні ў цэхах, але сёння нічога. Прынамсі, чаго-небудзь бачнага, каб казала пра напружанасць, незадаволенасці няма. Я думаю, яны (кіраўніцтва МТЗ — Тэлеграф) прымаюць меры па нейтралізацыі хваляванняў. Можа, потым з’явіцца якая-небудзь інфармацыя», — сказаў ён.
Раней у СМІ з’явілася інфармацыя аб тым, што праз чуткі аб дэвальвацыі на Мінскім трактарным заводзе паўстала стыхійная акцыя пратэсту. Працоўныя некалькіх цэхаў, спыніўшы працу, прынялі ўдзел у стачцы супраць росту коштаў і на той момант толькі меркаванай дэвальвацыі. Яны нібыта таксама выказвалі прапанову ісці да Дому ўрада. Да перамоваў з працоўнымі падключыліся кіраўнікі прадпрыемства, перадаваў «Беларускі партызан».