Міністр замежных спраў Беларусі Сяргей Мартынаў у ходзе візіту 22 снежня 2010 года ў Італію абмеркаваў перспектывы двухбаковага супрацоўніцтва са сваім італьянскім калегам Франка Фраціні. Кіраўнікі знешнепалітычных ведамстваў дзвюх краін ўзгаднілі дзеянні бакоў, накіраваныя на ўмацаванне ўзаемадзеяння ў сферах эканомікі, культуры, адукацыі, навукі і тэхналогій.
Як стала вядома журналісту Тэлеграфа, міністры замежных спраў прадметна абмеркавалі ўвесь спектр беларуска-італьянскіх адносінаў, у тым ліку пытанні рэалізацыі дамоўленасцяў, дасягнутых у ходзе візіту ў Беларусь у лістападзе 2009 года старшыні Рады міністраў Італіі Сільвіа Берлусконі.
Акрамя таго, як паведамілі ў МЗС Беларусі, Сяргей Мартынаў і Франка Фраціні абмяняліся думкамі па актуальных міжнародных тэмах і перспектывам супрацоўніцтва ў рамках праекту «Усходняга партнёрства» і Цэнтральна-еўрапейскай ініцыятывы.
За рамкамі афіцыйных перамоў міністры замежных спраў Беларусі і Італіі разам з сакратаром Дзяржаўнага сакратарыята Ватыкана па сувязях з дзяржавамі Дамінікам Мамберці і статс-сакратаром прэзідыума Рады міністраў, кіраўніком Камісіі па міжнародных усынаўленнях Італіі Карла Джаванардзі сустрэліся з сем’ямі італьянскіх грамадзянаў, якія ўсынавілі беларускіх дзяцей.
Мартынаў і Рамані абмеркавалі стварэнне італьянскага прамысловай акругі пад Берасце
Акрамя таго ў рамках візіту ў Італію Сяргей Мартынаў сустрэўся з міністрам эканамічнага развіцця Італіі Паола Рамані, у ходзе якой бакі абмеркавалі ўвесь спектр пытанняў двухбаковага гандлёва-эканамічнага і інвестыцыйнага супрацоўніцтва. У ліку іншага міністры абмяркоўвалі пытанні ўзгаднення крокаў па рэалізацыі дамоўленасцяў на вышэйшым узроўні аб стварэнні на тэрыторыі Берасцейскай вобласці італьянскай прамысловай акругі. Міністры прынялі рашэнне распрацаваць дакумент, які фіксуе пералік і паслядоўнасць сумесных мераў у дадзеным напрамку. Бакі плануюць падпісаць яго ў ходзе першага пасяджэння міжурадавай беларуска-італьянскай камісіі па эканамічным супрацоўніцтве, якое міністры дамовіліся правесці ў Рыме ў сакавіку-красавіку 2011 года.
Сяргей Мартынаў і Паола Рамані таксама дамовіліся аб правядзенні ў Берасці эканамічнага форуму — краінавай прэзентацыі Беларусі і італьянскай прамысловай акругі для патэнцыйных італьянскіх партнёраў, а таксама дэталёва абмеркавалі магчымасці нарошчвання двухбаковага ўзаемадзеяння ў сферы лагістыкі.
Finmeccanica SpA і Беларусь плануюць стварыць сумесныя прадпрыемствы
Акрамя ўсяго іншага Сяргей Мартынаў сустрэўся з прэзідэнтам буйнога італьянскага машынабудаўнічага холдынгу Finmeccanica П’ерам Франчэскам Гуаргуальіні. Бакі абмеркавалі ход рэалізацыі Мемарандума аб узаемаразуменні паміж урадам Беларусі і Finmeccanica SpA аб супрацоўніцтве ў сферы космасу, чыгуначнага транспарту і сістэм бяспекі. Па ініцыятыве беларускага боку бакі ўзгаднілі пералік першачарговых праектаў, пазначылі шляхі іх рэалізацыі, уключаючы перспектыву стварэння ў Беларусі сумесных вытворчых прадпрыемстваў.
