Цэнтральную выбарчую камісію Беларусі задаволіць любая дата правядзення прэзідэнцкіх выбараў, прызначаная ў адпаведнасці з заканадаўствам. Пра гэта заявіў сакратар Цэнтрвыбаркама Мікалай Лазавік. Па словах сакратара ЦВК, Цэнтрвыбаркам ужо гатовы да пачатку выбарчай кампаніі.
Мікалай Лазавік таксама паведаміў, што ўсе неабходныя матэрыялы, як для арганізатараў выбараў, так і для патэнцыйных кандыдатаў у прэзідэнты, ужо падрыхтаваныя, перадае БелаПАН.
Як раней перадаваў Тэлеграф, 6 верасня Мікалай Лазавік паведаміў аб тым, што дэпутаты беларускага парламенту не звярталіся ў ЦВК па кансультацыю па пытанні прызначэння даты прэзідэнцкіх выбараў, як яны звычайна гэта робяць.
Сакратар Цэнтрвыбаркама растлумачыў, што паводле дзейнага заканадаўства, прэзідэнцкія выбары прызначаюцца не пазней за пяць месяцаў да заканчэння паўнамоцтваў дзейнага кіраўніка дзяржавы, а праводзяцца не пазней за два месяцы. Такім чынам, цяперашнія выбары павінны быць праведзены не пазней за 6 лютага 2011 года.
