У пятніцу, 8 кастрычніка, у Цэнтральную выбарчую камісію паступіла заява аб выхадзе з выбарчай кампаніі старшыні Ліберальна-дэмакратычнай партыі Беларусі Сяргея Гайдукевіча. «Сапраўды, сёння ў ЦВК паступіла заява ад Сяргея Васільевіча Гайдукевіча. Заява кароткая, без матывацыі», — паведаміў карэспандэнту Тэлеграфа сакратар ЦВК Мікалай Лазавік.
«Згодна з заканадаўствам, нават зарэгістраваны кандыдат на пасаду прэзідэнта, можа ў любы час адмовіцца ад удзелу ў выбарчай кампаніі. А Сяргей Васільевіч яшчэ нават не зарэгістраваны ў якасці кандыдата, ён просты грамадзянін, як мы з вамі», — адзначыў сакратар ЦВК.
«Па сутнасці, Сяргей Гайдукевіч мог нават не падаваць заяву ў ЦВК. Выбарчы Кодэкс не ўтрымлівае ніякіх абмежаванняў аб зняцці кандыдатуры з выбараў. Больш за тое, заканадаўча гэты працэс ніяк не рэгламентуецца. Прэтэндэнт, які вырашае адмовіцца ад удзелу ў выбарах, можа проста спыніць дзейнасць сваёй ініцыятыўнай групы», — дадаў Мікалай Лазавік.
Патэнцыйны кандыдат у прэзідэнты пенсіянер, інжынер-будаўнік Пётр Барысаў, які таксама заяўляў пра жаданне зняць сваю кандыдатуру на карысць Віталя Рымашэўскага, па словах Мікалая Лазавіка, можа не апавяшчаць аб сваім рашэнні ЦВК. «Тут сітуацыя больш зразумелая. У гэтага кандыдата вельмі маленькая ініцыятыўная група — усяго 110 чалавек. З такой колькасцю членаў сабраць неабходныя 100 тыс. подпісаў проста нерэальна», — адзначыў сакратар ЦВК.
Лазавік: ЦВК не думаў здымаць Някляева з выбараў
Мікалай Лазавік таксама абверг інфармацыю аб тым, што ЦВК мае намер зняць з прэзідэнцкіх выбараў Уладзіміра Някляева за датэрміновую агітацыю. «Пакуль здымаць няма каго. Ёсць падставы папярэдзіць ініцыятыўную групу, а не самога Някляева», — сказаў Мікалай Лазавік.
«Такіх думак, як зняць Уладзіміра Някляева з рэгістрацыі, у ЦВК не было. Наадварот, мы цяпер праяўляем максімум цярпімасці, каб прадэманстраваць тэзіс, заяўлены ЦВК перад пачаткам выбарчай кампаніі. Мы імкнемся стварыць максімальна спрыяльныя ўмовы для ўсіх кандыдатаў. Тым не менш, гэта не значыць, што ініцыятыўныя групы могуць злоўжываць нашым даверам. Калі з’явяцца нейкія сур’ёзныя парушэнні, яны, вядома, будуць спыняцца», — дадаў сакратар ЦВК.
